Ադրբեջանը երկու ֆրոնտով պատերազմ է մղում. Հայկ Սուքիասյան
ՔաղաքականՀունիսի 8-ի երեկոյան՝ ժամը 21:00-23:30-ն ընկած ժամանակահատվածում, ադրբեջանական զինուժը կրակ է բացել Բաղանիսի ուղությամբ՝ 2 ժամից ավելի կրակելով «ՊԿ» և «ԴՇԿ» տիպի գնդացիրներից և հրաձգային զենքերից: ԼՈւՐԵՐ.com-ի հետ զրույցում քաղաքագետ Հայկ Սուքիասյանն, անդրադառնալով Ադրբեջանի հերթական ագրեսիային, հարց է հնչեցնում՝ ի՞նչ իրավունքով է Ադրբեջանը կրակում ինքնիշխան Հայաստանի Հանրապետության սահմաններին. «Հայաստանի Հանրապետությունը կոնֆլիկտի կողմ չէ, հետևապես՝ կոնֆլիկտի էության հետ ուղղակի առնչություն չունեցող ինքնիշխան պետություն է: Կոնֆլիկտի երկու կողմերն են՝ Արցախի Հանրապետությունը և Ադրբեջանական Հանրապետությունը: ՄԱԿ-ի չորս բանաձևերից մեկում ամրագրված է, որ Հայաստանի Հանրապետությունը կոնֆլիկտի կողմ չէ: Հարց է առաջանում. ի՞նչ իրավունքով է Ադրբեջանը կրակում ինքնիշխան Հայաստանի Հանրապետության սահմաններին: Սա միջազգային իրավունքի խախտում է, և Հայաստանի Հանրապետությունն ունի միջազգային նորմերով ամրագրված բոլոր իրավունքներն՝ ադրբեջանական պետությունը վերջնականապես ոչնչացնելու համար»:
Հարցին՝ իսկ ինչո՞ւ Հայաստանն այդ քայլին չի դիմում և ինչո՞ւ է Ադրբեջանը շարունակում անպատիժ կրակել ինքնիշխան Հայաստանի Հանրապետության վրա, քաղաքագետը պատասխանեց. «Հարցրեք հայ ժողովրդի «գիգանտին»՝ «Հանրապետական» կուսակցությանը: Միջազգային իրավունքի տեսանկյունից՝ Ադրբեջանը որևէ իրավունք չունի Հայաստանի Հանրապետության սահմաններին կրակելու: Բայց, քանի որ ՀՀ-ում շռնդալից հաղթանակ է տարել «Հանրապետական» կուսակցությունը, որի արտգործնախարարը մեկ այլ «գիգանտ» Էդուարդ Նալբանդյանն է, և այդ կուսակցությունը որդեգրել էր «Անվտանգություն և առաջընթաց» ծրագիր-կարգախոսը, ապա հենց դա էլ տեղի է ունենում: Ես հարց եմ տալիս ՀՀԿ-ին՝ ի՞նչ են իրենք հասկանում անվտանգություն ասելով: Սա՞ է իրենց պատկերացրած անվտանգությունը: Ես ասեմ, որ սա նաև Ադրբեջանի կողմից Հայաստանի Հանրապետության վերաբերյալ պատկերացրած անվտանգությունն է»:
Խոսելով վարվող անտարբեր և զուտ պաշտպանվողական քաղաքականության և դրա հետևանքների մասին՝ Հայկ Սուքիասյանը շեշտեց, որ եթե հայանուն օլիգարխները շարունակեն Հայաստանի պետական և ազգային ունեցվածքի կողոպուտը, եթե ինչ-որ մարդիկ շարունակեն վարչապետի պաշտոնի վերաբերյալ տարատեսակ «մուտիլովկաները», ապա մենք ականատես կլինենք ադրբեջանական կողմից ավելի մեծ այլանդակությունների:
«Սա Հայաստանի Հանրապետության ներքին թուլության արտաքին արձագանքն է: Հայաստանի Հանրապետության իշխանութուն կոչվածները պետք է հասկանան, որ այսպես շարունակվել չի կարելի: Ես առաջարկում եմ «Հանրապետական» կուսակցության կորիֆեյներին գալ և հանրությանը բացատրել, թե ի՞նչ են իրենք հասկանում անվտանգություն ասելով, ընդ որում՝ առանց բլեֆի և դեմագոգիայի, թե իբր` մենք կիսապատերազմական իրավիճակում ենք և նման այլ տգիտություններ»,-նշեց քաղաքագետը՝ հավելելով, որ անվտանգությունը հենց ՀՀԿ-ի կարգախոսն է, ուստի թող գան և բացատրեն՝ ի՞նչ են հասկամում անվտանգություն ասելով և դա անեն առանց բլեֆի:
Մեր զրուցակցի պնդմամբ՝ Արդբեջանը եթե երկու ֆրոնտով պատերազմ է մղում և՛ Արցախի Հանրապետության, և՛ Հայաստանի Հանրապետության դեմ, հետևաբար, ինչո՞ւ մենք էլ մեկ ֆրոնտով Ադրբեջանի դեմ չենք կարող պատերազմել:
«Հայաստանի և Արցախի ռազմական էլիտաները պետք է որոշում կայացնեն. դա պիտի լինի ռազմաքաղաքական որոշում՝ պետք է վերջնականապես լուծել այդ արհեստական պետության՝ Ադրբեջանի հարցերը, դրա բոլոր հիմքերը կան»,-խոսքը եզրափակեց քաղաքագետը:
Աղավնի Սուքիասյան