Մոսկվայում Արցախի վերաբերյալ որևէ նոր փաստաթուղթ չի ստորագրվել. ՀՀ ԱԳ նախարար
ՔաղաքականԱրտագին գործերի նախարար Էդվարդ Նալբանդյանն այսօր Էստոնիայի ԱԳ նախարար Սվեն Միքսերի հետ մամուլի ասուլիսի ժամանակ պատասխանել է լրագրողների հարցերին՝ անդրադառնալով հայ հասարակությանը հուզող մի շարք խնդիրներին:
Խոսելով Մոսկվայում Հայաստանի, Ադրբեջանի և Ռուսաստանի արտգործնախարարների վերջին հանդիպման մասին՝ նախարարը նշեց, որ այդ հանդիպման ընթացքում որևէ նոր փաստաթուղթ չի ստորագրվել կողմերի միջև. «Մոսկվայում որևէ փաստաթղթի շուրջ բանակցություններ չեն եղել, կողմերի միջև փաստաթուղթ չի ստորագրվել, միակ տեքստը, որ քննարկվել է, հանդիպման մամուլի հաղորդագրության տեքստն էր, որը հետո հրապարակվել է նույնությամբ՝ Հայաստանի և ՌԴ կողմից»։
Մամուլի ասուլիսի ժամանակ Էստոնիայի արտգործնախարար Սվեն Միկսերն, անդրադառնալով Հայաստանի հետ վիզաների հնարավոր ազատականացման հարցին նշեց, որ մարդկանց ազատ տեղաշարժման հնարավորությունը շատ կարևոր հարց է:
«Ազատ տեղաշարժը շատ կարևոր ասպեկտ է՝ երկրներն ու ազգերն իրար մոտեցնելու հարցում։ Ես շատ կուզեի տեսնել ԵՄ և Հայաստանի միջև մարդկանց տեղաշարժի դյուրացման իրականացումը։ Ինչ վերաբերում է այս գործընթացի ավարտին, սա հիմնված է որոշակի չափանիշների վրա և Էստոնիան շահագրգռված է տեսնել այդ գործընթացի ավարտը»,-նշեց Հայաստան ժամանած պաշտոնյան՝ շեշտելով, որ գործընթացը մեկնարկել է և մնացածը կախված կլինի Հայաստանից, թե ինչ կանի չափանիշների բավարարման ուղղությամբ։