Նիկոլ Փաշինյանի «նամյոկը» վարչապետին
ՔաղաքականՀՀ ԱԺ ընդիմադիր դաշինքի ղեկավար Նիկոլ Փաշինյանը, ֆուտբոլային լեզվով ասած՝ գեղեցիկ փոխանցում կատարեց Կարեն Կարապետյանի դաշտ, քողարկված աջակցություն հայտնելով Կարեն Կարապետյանին՝ Սերժ Սարգսյանի հետ տարվող ներպալատական կռվում:
Իր ընդարձակ ելույթի վերջում Փաշինյանը բացահայտ ասաց. ԵԼՔ դաշինքը չի մտնում այն անձանց շրջանակի մեջ, որոնք Սերժ Սարգսյանին «համոզում են» 2018 թվականին ստանձնել ՀՀ վարչապետի պաշտոնը»: Փաշինյանը, մինչ այս տողերն ասելը, հիշեցրեց, որ այդպիսի խոսքեր է ասել նաև վարչապետ Կարեն Կարապետյանը:
Հայտնի գովազդային հոլովակի նման. «Երբ մեր շահերն են համընկնում»: Միամտություն կլինի կարծել, թե Փաշինյանի այս խոսքերը հենց այնպես՝ օդի մեջ ասված խոսքեր էին: Լինելով ընդդիմադիր խմբակցության լիդեր, բնական է, որ Փաշինյանը չէր կարող, օրինակ, ասել. «Պարոն Կարապետյան, մենք Ձեր կողմից ենք»: Եվ քանի որ չէր կարող բացահայտ աջակցել իշխող կուսակցության վարչապետին, Փաշինյանն իր առաջարկությունն արեց քողարկված կերպով:
Վերլուծաբաններն ու քաղաքագետները տարբեր առիթներով արձանագրել են, որ Կարեն Կարապետյանն ըստ էության մնացել է մեն-մենակ՝ պառլամենտի դեմ: Ինքն է ու իր մի քանի տեխնոկրատ նախարարները, իսկ ԱԺ-ում՝ ունի-չունի՝ մի հավատարիմ խորհրդական ունի, որն, ըստ էության՝ ոչինչ անել չի կարողանում:
Նիկոլ Փաշինյանը նուրբ ակնարկ արեց, երևի հասկացնելով, թե. «Պարո՛ն Կարապետյան, Ձեր կուսակցությունը Ձեզ խորհրդարանում չի աջակցելու, բայց ա՛յ մենք՝ Ձեր կողմից ենք»:
Թե ինչ զարգացումներ կունենա Փաշինյան-Կարապետյան՝ այս հեռակա բանակցություններն ու «նամյոկները» ցույց կտա ժամանակը:
Մի հարց նույնպես մնում է օդի մեջ կախված. եթե հանկարծ Կարեն Կարապետյանը մնա վարչապետ՝ 18-ից հետո, հավանակա՞ն է, որ ԵԼՔ-ը կմիանա Կարապետյանի կառավարությանը և կօգնի «առաջընթացին»՝ չխառնվելով «անվտանգության» գործերին:
Արսեն Սանամյան