Արցախը մեր ապրած հայրենիքն է, որի ամեն մետրի վրա պատմություն կա. Մանվել Գրիգորյան (տեսանյութ, լուսանկարներ)
ՏեսանյութերՇուշի քաղաքում տեղի ունեցավ երկրապահական ուխտագնացության մայր միջոցառումը, որին ներկա էին Արցախի նախագահ Բակո Սահակյանը, վարչապետ Արայիկ Հարությունյանը, Ոստիկանության պետ Կամո Աղաջանյանը, Պարգև և Եզնիկ սրբազանները, Արցախի ազատամարտիկների միության նախագահ Օգանովսկին, Արցախի Ազգային ժողովի Արտաքին հարաբերությունների հանձնաժողովի նախագահ Արզիկ Մխիթարյանը, արցախցիներ և այլք:
Էջմիածնի քաղաքապետարանի մշակույթի պալատի խմբերն ապահովեցին միջոցառման երաժշտական հատվածը իրենց հայրենասիրական երգերով և պարերով: Արցախի նախագահ Բակո Սահակյանն իր խոսքում ևս մեկ անգամ բարձր գնահատեց երկրապահի և Մանվել Գրիգորյանի կատարած աշխատանքը և ավանդական դարձած ուխտագնացությունը: Նախագահը բաժակ բարձրացրեց հոգևոր դասի ներկայացուցիչներ Պարգև և Եզիկ Սրբազանների համար, քանի որ վեջիններս են օրհնում ուխտավորներին:
Միջոցառման ժամանակ սրտաբուխ խոսքեր էին ասում բոլորը՝ ազատամարտիկները, մտավորականները հոգևորականները, երկրապահ կամավորականները: Իսկ պատանի երկրապահները հանդես եկան ցուցադրական ելույթներով՝ մինչ ուշ գիշեր Արցախ աշխարհը լցնելով ազգային երգ ու պարով, խինդ ու ծիծաղով, ազատագրված հայրենիքում ապրելու հաստատուն վստահությամբ ու նահատակների կյանքի և իրենց սխրանքների գնով ձեռք բերած հաղթանակը հավերժ պահպանելու հավատով:
Երկրապահական ուխտագնացություն դեպի Արցախ 2017-ը հաջողությամբ իրագործված է: Հանրապետության բոլոր մարզերի և Արցախի երկրապահներն ու սահմանաբնակ երկրապահ ժողովուրդն անհամբեր սպասում են ուխտագնացություն 2018-ին, թեպետ մինչ այդ էլ հանդիպումների առիթներ լինելու են: Իսկ ուխտագնացություն երևույթի նշանակությունն ու կարևորությունը լավագույնս ներկայացրեց հենց այս իրադարձության հիմնական կազմակերպիչը՝ ԵԿՄ վարչության նախագահ, Արցախի հերոս Մանվել Գրիգորյանը։
«Արցախը մեր ապրած հայրենիքն է որի ամեն մետրի վրա պատմություն կա: Մենք ամբողջ աշխարհին ուզում ենք ասել, որ մենք կանք, լինելու ենք ու շարունակելու ենք ապրել: Սա միասնության ձևաչափ է»,- նշեց Մանվել Գիգորյանը: Նա հերթական անգամ կրկնեց, որ Երկրապահը 1989թ.-ից Արցախում է և երբեք չի լքելու Արցախը. արցախցին միշտ էլ կարող է վստահել և ապավինել Երկրապահին:
Քրիստինա Աղալարյան
Արցախ