Հարկայինի նախկին պաշտոնյայի ընտանեկան ապօրինությունները
ՀասարակությունԼՈՒՐԵՐ.com-ը, հավատարիմ մնալով իր որդեգրած սկզբունքներին, այն է՝ լինել հետևողական, անաչառ և օբյեկտիվ՝ ցանկացած թեմա լուսաբանելիս, շարունակում է ներկայացնել ՀՀ ԿԱ ՊԵԿ Կապանի տարածքային հարկային տեսչության սպասարկման բաժնի նախկին պետ Նարինե Աբրահամյանի վերաբերյալ պատմության ուշագրավ մանրամասները:
Նշենք՝ ՊԵԿ նախագահին Աբրահամյանից հիմնավոր դժգոհություններ և բողոքներ էին ներկայացրել Կապանի ՏՀՏ մի խումբ աշխատակիցներ, ինչը հետագայում ՊԵԿ ղեկավարության կողմից հաստատվեց, ու Հարկային և մաքսային մարմինների ծառայողական քննություն անցկացնող հանձնաժողովի եզրակացության հիման վրա, ՊԵԿ նախագահի հրամանով, սույն պաշտոնյան 2017թ. հունիսի 13-ին հեռացվեց հարկային ծառայությունից:
Փաստենք՝ ՊԵԿ նախագահը հավատարիմ է իր և իր թիմի որդեգրած սկզբունքներին:
Վերադառնանք մեր «հերոսին»:
Իհարկե, մեր թանկագին ժամանակից չէինք կորցնի և կրկին անդրադառնա Նարինե Աբրահամյանին, եթե այս անգամ էլ Մեղրիի բնակիչներից ահազանգեր չստանայինք նրա ընտանիքի անդամների հետ կապված մի քանի անօրինականությունների մասին:
Եվ այսպես: Սկսենք նրանից, որ Մեղրի քաղաքի Զորավար Անդրանիկի 28/9 հասցեում գտնվող շինությունը, որը սեփականության իրավունքով պատկանում է Նարինե Աբրահամյանի ամուսնուն՝ Ստյոպա Մաթևոսյանին, ըստ մեր տեղեկությունների՝ 2008թ. սեփականության իրավունքի պետական գրանցում է ստացել առանց ոչ ամբողջական և օրինական իրավահաստատող փաստաթղթերի: Գույքի նկատմամբ սեփականության իրավունքի գրանցումն առանց համապատասխան իրավահաստատող փաստաթղթերի՝ անշարժ գույքի պետական կադաստրի համապատասխան աշխատակցի կամ աշխատակիցների կողմից թույլ տրված անօրինական քայլ է, որը ենթակա է ուսումնասիրման և ճիշտ գնահատման: Անօրինական գործողություններով չի պահպանվել այդ գործարքից ծագող իրավունքների պետական գրանցման պահանջը, որը հանգեցնում է գործարքի անվավերության, և մեր կարծիքով՝ Մեղրի համայնքը ղեկավարը պետք է դիմի համապատասխան ատյան՝ այդ գործարքը առ ոչինչ համարելու պահանջով:
Առավել ուշագրավ է այն փաստը, որ անօրինական գրանցված շինության հետ կապված՝ առկա են հետագա ապօրինի կառուցապատումներ: Այդ մասին ահազանգ ստանալուց հետո, առավել մանրամասն տեղեկություն ստանալու նպատակով, դիմեցինք Մեղրի համայնքի ղեկավար Մխիթար Զաքարյանին:
Մեր գրավոր հարցմանն ի պատասխան՝ համայնքապետարանի աշխատակազմի համապատասխան բաժնի կողմից կատարվել է ուսումնասիրություն, ինչի արդյունքում պարզվել է, որ Ստյոպա Մաթևոսյանին պատկանող 0,003 հա հողամասի վրա կառուցված երկհարկանի շինության փաստացի չափերը չեն համապատասխանում սեփականության իրավունքի գրանցման վկայականում նշված չափերին: Սեփականության իրավունքի գրանցման վկայականում գրանցվել է մեկ հարկանի շինություն՝ 24,4 քմ ներքին մակերեսով, իսկ համաձայն չափագրման արդյունքների՝ նշված շինության երկրորդ հարկը և առաջին հարկի ետնամասը կառուցվել է ինքնակամ՝ առանց համապատասխան թույլտվության:
Վերոնշյալ ինքնակամ կառույցի համար, նախկինում՝ 2013 թվականի դեկտեմբերի 9-ին, Մեղրի համայնքի նախկին ղեկավարի կողմից ընդունվել է որոշում՝ Ստյոպա Մաթևոսյանին վարչական պատասխանատվության ենթարկելու մասին: Ի դեպ՝ ըստ մեր տեղեկությունների՝ այդ գումարը մինչ այժմ ամբողջական վճարված չէ:
Քաղաքապետարանից մեզ տրված պատասխանում նաև նշված էր, որ տեղում կատարվում է լրացուցիչ ուսումնասիրություն վերոհիշյալ ինքնակամ կառույցը օրենքով սահմանված կարգով օրինական ճանաչելու, կամ քանդելու և հողամասի նախկին վիճակը վերականգնելու նպատակով: Պատասխան գրությունից և գրությանը կից քաղվածքից (2013 թվականի դեկտեմբերի 9-ին Մեղրի համայնքի նախկին ղեկավարի որոշման. խմբ) ակնհայտ է այն փաստը, որ Ստյոպա Մաթևոսյանը ինքնակամ շինությունը ոչ օրինակացրել է, ոչ էլ քանդել, այսինքն` շարունակել է կատարել այդ արարքը, ավելին՝ ապօրինի կառուցել է նաև երկրորդ հարկը:
Համաձայն ՀՀ Վարչական իրավախախտումների վերաբերյալ օրենսգրքի 154-րդ հոդվածի 2-րդ մասի՝ առաջին անգամ արարքը կատարելու համար տուգանվելուց հետո այն կատարել շարունակելն առաջացնում է տուգանքի նշանակում` սահմանված նվազագույն աշխատավարձի 2500-ապատիկի չափով: Հաշվի առնելով այն հանգամանքը, որ համայնքի ղեկավարի կողմից համայնքային սեփականություն հանդիսացող հողամասերի ինքնակամ զավթումը, շենքերի և շինությունների ինքնակամ կառուցումը կասեցնելու միջոցներ դիտավորությամբ չձեռնարկելը, ինչպես նաև հողամասերն ինքնակամ զավթած, ինքնակամ կառույց իրականացնող կամ իրականացրած անձանց նկատմամբ վարչական իրավախախտումների վերաբերյալ օրենսդրությամբ նախատեսված վարչական պատասխանատվության միջոցները դիտավորությամբ չկիրառելը ՀՀ քրեական օրենսգրքի 315.2 հոդվածի համաձայն առաջացնում է քրեական պատասխանատվություն, համոզված ենք, որ Մեղրի համայնքի ղեկավարը ողջամիտ ժամկետում Ստյոպա Մաթևոսյանի վերոնշյալ արարքի շարունակումը կկասեցնի և նրա նկատմամբ կկիրառի վարչական պատասխանատվություն:
Անցնենք պատմության հաջորդ մասին: Մինչ կներկայացնենք պատմությունը, նշենք ցավալի մի փաստ. ազգի հերոսների, կյանքի գնով «պոստ» պահող տղաների կողքին կան Նարինե Աբրահամյանի որդու՝ Արտուշ Մաթևոսյանի նման երիտասարդներ, ովքեր ամեն կերպ խուսափել ու շարունակում են խուսափել զինվորական ծառայությունից, չհասկանալով, որ ազգին ծառայելը, ազգի սահմանները երկու տարի անառիկ պահելը ցանկացած տղայի սրբազան պարտքն է, հպարտություն է: Ըստ մեղրեցիներից ստացված հավաստի տեղեկությունների՝ Արտուշ Մաթևոսյանն ազատվել է ժամկետային զինվորական ծառայությունից՝ ինչ-որ շինծու հիվանդության պատճառով: Պարզելու համար, թե ինչ հիմքով է երիտասարդն ազատվել ծառայությունից, գրավոր հարցում ուղարկեցինք Պաշտպանության նախարարություն: Նախարար Վիգեն Սարգսյանին հասցեագրված հարցման պատասխանից տեղեկացանք, որ Արտուշ Ստյոպայի Մաթևոսյանը 14.05.2010թ. կենտրոնական բժշկական հանձնաժողովի որոշմամբ, համաձայն ՀՀ պաշտպանության նախարարի 175 հրամանի 31-րդ հոդվածի «ա» կետի պահանջների՝ ճանաչվել է զինվորական ծառայությանը ոչ պիտանի՝ հանվելով զինվորական հաշվառումից: Իսկ այդ կետով սահմանված հիվանդությունը հետևյալն է՝ Երիկամների բորբոքային և դիստրոֆիկ հիվանդություններ՝ III-II աստիճանի քրոնիկական երիկամային անբավարարությամբ:
Կենտրոնական բժշկական հանձնաժողովի անդամների գործողությունները ևս ենթակա են ուսումնասիրման և ճշգրտման: Արդյոք Արտուշ Մաթևոսյանը իրականում տառապո՞ւմ է այդ հիվանդությամբ: Արդյոք կենտրոնական բժշկական հանձնաժողովն այն ժամանակ ճիշտ ախտորոշո՞ւմ է տվել, թե՞ այդ որոշման մեջ աշխատել են տարբեր գործոններ, հայտնի կդառնա միայն նոր բուժզննում կատարելուց հետո:
Վերջում հույս հայտնենք, որ իրավապահ մարմինները ձեռքները ծալած չեն նստի և այս հոդվածը կընդունեն որպես հաղորդում մի քանի հանցագործությունների մասին ու համապատասխան ընթացք կտան…
Քրիստինա Աղալարյան