Թանկացումներում դիտավորություն կա. դա 5% տնտեսական աճին հասնելու եղանակ է
ՏնտեսությունՎերջին շրջանում սննդամթերքի շուկայում թանկացումներ են տեղի ունեցել: Գնաճը վերաբերում է հատկապես մսի, կաթնամթերքի, բանջարեղենի շուկային:
Գնաճն իրեն ավելի զգացնել կտա հատկապես Ամանորից հետո: Այս կարծիքին է տնտեսագետ Վահագն Խաչատրյանը, ով ԼՈւՐԵՐ.com-ի թղթակցի հետ զրույցում նկատեց. «Նոր տարուց հետո կանխատեսելի են թանկացումները, քանի որ սկսելու է լիարժեք գործել մաքսային օրենսգիրքն ու ԵԱՏՄ-ի հետ անդամակցելու ժամանակ մեր ստանձնած պարտավորություններն ուժի մեջ են մտնելու: Արտոնությունները վերացվելու են, և Հայաստան ներկրվող որոշ ապրանքնատեսակների նկատմամբ կիրառվելու է ավելի բարձր մաքսադրույքաչափեր, որը, բնական է՝ կբերի գնաճի: Թե քանի տոկոսով, դա դեռևս պարզ չէ: Համենայն դեպս, գնաճը կվերաբերվի ավելի քան 470 անուն ապրանքների»,- ասաց նա:
Տնտեսագետի խոսքով՝ թանկացումները պետական պաշտոնյաները կապում են միջազգային բորսաներում արժույթի աճի հետ. «Օրինակ, որտեղից Հայաստանը կարագ է ներմուծում, այդ երկրում թանկացում եղել է, ինչը, բնականաբար, ազդում է մեր երկրում կարագի գնի վրա»:
Տնտեսագետը կարծում է, որ պետք է հաշվի առնել նաև այն հանգամանքը, որ համաշխարհային արժութային շուկայում եվրոյի արժևորում է տեղի ունեցել, բացի այդ՝ գնաճը երբեմն պայմանավորված է լինում սպառման ծավալների փոքրացման հետ, քանի որ բնակչության եկամուտների էական մեծացում տեղի չի ունեցել և շուկայում այդ ապրանքատեսակների նկատմամբ պահանջարկը չի մեծանում. «Մեզ մոտ միշտ հակառակ երևույթն է. երբ պահանջարկը չի մեծանում, տվյալ դեպքում պետք է գների անկում տեղի ունենա, բայց մեր շուկայի մասնակիցները հակառակն են անում: Սա հայկական շուկային բնորոշ հանգամանք է: Կարևոր հանգամանքներից գլխավորն այդ պայմաններում մրցակցության բացակայությունն է և մոնոպոլ դիրքը, որը թույլ չի տալիս, որ շուկայում գինը ձևավորվի ազատ մրցակցության պայմաններում»,- նշեց տնտեսագետը:
Վահագն Խաչատրյանը տեսակետ հայտնեց, որ գնաճն ունի նաև քաղաքական ենթատեքստ. Նախագահը կառավարության առջև 5 տոկոս տնտեսական աճի խնդիր է դրել, դրան պետք է մի կերպ հասնել, իսկ այս թանկացումները կհեշտացնեն գործը:
Սոնա Հարությունյան