Լարսում կուտակված է 385 բեռնատար. վարորդները դժգոհում են ուտելիքի բարձր գներից
ՀասարակությունՍտեփանծմինդա-Լարս ավտոճանապարհին մեքենաների կուտակումները շարունակվում են: Ներկա դրությամբ կուտակված է 385 բեռնատար: Այս մասին ԼՈւՐԵՐ.com-ի թղթակցի հետ զրույցում հայտնեց ՀՀ արտակարգ իրավիճակների նախարարության տեղեկատվության և հասարակայնության հետ կապի վարչության պետի տեղակալ Նանա Գնդոյանը:
«Մարդատար մեքենաների և ավտոբուսների համար ճանապարհը բաց է, միայն բեռնատարները չեն կարողանում անցնել Լարսով: Ռուսաստանի արտակարգ իրավիճակների նախարարությունից մեզ տեղեկացրին, որ վրաններ են տեղադրել, որտեղ մարդիկ կարող են թեյել, ճաշել և տաքանալ»,- ասաց Գնդոյանը:
ԼՈւՐԵՐ.com-ին ահազանգած վարորդները դժգոհություն հայտնեցին, որ վրաններում տրված թեյը և սնունդը բավարար չէ, ուստի ստիպված են լինում օգտվել տարածքում առկա խանութներից, որտեղ բավականին թանկ է ամեն բան, բայց այլ տարբերակ չունեն, իսկ շատերն արդեն գումար չունեն սնունդ գնելու համար:
«Ինչը չի սպասարկում վրանը, վարորդներն են ձեռք բերում՝ սեփական միջոցներով հոգալով ծախսերը, իսկ վրանի սպասարկման ծախսերն իրականացնում է ՌԴ-ի ԱԻՆ-ը»,- նշեց Գնդոյանը:
Հարցին՝ ՀՀ ԱԻՆ-ը ինչ քայլեր է ձեռնարկում ստեղծված իրավիճակը շտկելու ուղղությամբ, քանի որ, ի վերջո՝ մեր համերկրացիներից շատերն են հայտնվել անելանելի իրավիճակում, Գնդոյանը պատասխանեց.
«Քանի որ ստեղծված իրավիճակը տեղի է ունենում Ռուսաստանի տարածքում, արտակարգ իրավիճակի շտկման գործողություններն իրականացնում է ՌԴ ԱԻՆ-ը՝ իհարկե՝ մեզ հետ անընդհատ կապի մեջ լինելով: Դա արձագանքման ստանդարտ գործընթաց է:
Ամեն բան արվում է, որպեսզի հնարավորինս շուտ կարողանան ճանապարհը բացել: Ե՛վ ռուսական, և՛ վրացական կողմի հետ կապի մեջ ենք և եթե կարիք լինի՝ ավելի լայնամասշտաբ արձագանքման՝ մեր ԱԻՆ-ը ևս գործողություններ կիրականացնի, իսկ արձագանքման գործողությունները նույն են լինելու՝ այն, ինչ անում է ՌԴ ԱԻՆ-ը»:
Սոնա Հարությունյան