Ինչ են խնդրում Ձմեռ պապից մեր պաշտոնյաները
ՀասարակությունՄոտենում է Ամանորը: Շատերս ցանկություններ ենք պահում թե՛ մեզ, թե՛ մեր հարազատների համար: Ոմանք՝ հավատալով Ձմեռ պապի գոյությանը, նամակներ են գրում՝ ակնկալելով դրանց իրագործումը:
Իսկ թե ինչ նամակ են գրել Ձմեռ պապին, ի՞նչ են խնդրել նրանից և արդյոք հավատո՞ւմ են նրա գոյությանը ՀՀ նախկին և ներկայիս պաշտոնյաները՝ ԼՈւՐԵՐ.com-ը փորձեց պարզել հենց նրանցից:
ՀՀ ԱԺ փոխնախագահ Էդուարդ Շարմազանովը մոտեցող տոներից առավել կարևորում է Սուրբ ծնունդը. «Մենք Աստծուց ենք խնդրում, Ձմեռ պապիկից չենք խնդրում: Մեր երկրին ցանկանում եմ խաղաղություն, ժողովրդին՝ առողջություն, բարեկեցություն, պետական պաշտոնյաներին՝ լավ աշխատանք, իմաստություն, որպեսզի լավ ծառայեն ժողովրդին: 2017 թ.-ը ընդհանուր առմամբ խաղաղության և հուսադրող տարի էր, Աստված տա՝ 2018-ն ավելի լավ տարի լինի:
Ձմեռ պապին կերպար է, որին մեր ցանկություններն ենք ասում: Ինձ համար առավել կարևոր է Սուրբ ծնունդը: Իհարկե, պետք է տոնել Ամանորը, բայց ժողովուրդը մեծ ակնկալիքներ պետք է ունենա ոչ թե Նոր տարուց, այլ Սուրբ ծնունդից, որը հոգևոր, ընտանեկան տոն է, և որի ժամանակ հնարավորություն ունենք սխալների համար ներողութուն խնդրել: Իսկ Նոր տարին ավելի կենցաղային տոն է»:
ԱԺ պաշտպանության և անվտանգության հարցերի մշտական հանձնաժողովի փոխնախագահ Ռուստամ Մախմուդյանն էլ, անդրադառնալով հարցին՝ հավատո՞ւմ է Ձմեռ պապի գոյությանը, թե ոչ՝ այսպես պատասխանեց. «Հավատացեք՝ հավատում եմ: Ձմեռ պապին խնդրում եմ, որ երկրին խաղաղություն լինի, բոլորիս ընտանիքներում լինի այն խաղաղ անդորրը, որը բնորոշ է հայ ավանդական ընտանիքներին: Ցանկանում եմ, որ մեր ընտանիքի անդամները լինեն առողջ ու անփորձանք»:
Կառավարությանն առընթեր պետական գույքի կառավարման վարչության պետ Արման Սահակյանն էլ Ձմեռ պապից խաղաղություն ու էլի խաղաղություն է խնդրելու:
ԱԺ ՀՀԿ նախկին պատգամավոր Առաքել Մովսիսիյանը Ձմեռ պապի գոյության առումով իրեն խաբված է զգում, իսկ խնդրանքն էլ հայ ժողովրդի համար է. «Ձմեռ պապին ի՞նչ պետք ա տա մեզ: Երեխա ժամանակ խաբեցին Ձմեռ պապիով, որ էս օրն ընկանք: Ձմեռ պապիկին ի՞նչ պետք ա ցանկանանք, Ձմեռ պապին ի՞նչ պետք ա տա: Ցանկանում ենք, որ մեր հայ ժողովրդին առողջություն, հաջողություն լինի, վսյո՛»:
Սոնա Հարությունյան