Նախադեպ, որն անխտիր կտարածվի բոլոր փախստականների վրա
ՔաղաքականԱզգային ժողովի ՀՀԿ խմբակցության պատգամավոր Գևորգ Կոստանյանն այսօր, Ազգային ժողովում, անդրադառնալով ՄԻԵԴ սումգայիթյան ցեղասպանության հայցով ներկայացված դիմումներին, նշեց, որ բոլոր փախստականների անունից Եվրոպական դատարանում 700-ից ավելի հայց կա։
Կոստանյանի խոսքով՝ դրանցից մեկով՝ «Սարգսյանն ընդդեմ Ադրբեջանի» գործով Եվրոպական դատարանը Մարդու իրավունքների եվրոպական դատարանը պարտավորեցրել է Ադրբեջանին երեք ամսվա ընթացքում Սարգսյանների ընտանիքին վճարել 5000 եվրո՝ որպես նյութական և ոչ նյութական վնասի փոխհատուցում, ինչպես նաև 30 հազար եվրո՝ դատական ծախսերի համար։
Կոստանյանը նաև ընդգծեց, որ թեև Սարգսյանը Գետաշենից է, բայց դա չի նշանակում, որ Եվրոպական դատարանը միայն գետաշենցի փախստականների հայցերին է անդրադառնալու:
«Սա չբացառեց մյուս բնակավայրերից եղած հայցերի քննարկումը: Այն բոլոր գործերը, որոնք ներկայացված են Եվրոպական դատարանին, բոլորն էլ քննվելու են: Սա նախադեպ է, որը տարածվելու է անխտիր բոլոր փախստականների վրա: Սրանով դատարանը իրավական հիմք սահմանեց մյուս հարցերի քննարկման համար, ու սա նախադեպ էր Բաքվի, Սումգայիթի, Արծվաշենի փախստականների հարցը լուծելու համար»,-ասաց Կոստանյանը։
Պատգամավորը նշեց, որ ՄԻԵԴ-ի կողմից հայցերի բավարարումը միտված է նրան, որ փախստականները բացարձակ երաշխավորված լինեն իրենց գույքերի վերադարձի, վերականգնման և պաշտպանության, այդ թվում՝ իրենց բնակավայրեր վերադառնալու հարցով և սա չգիտակցել և չհասկանալն իր համար ընդունելի չէ։
Հիշեցնենք, որ Մարդու իրավունքների Եվրոպական դատարանի մեծ պալատը հրապարակել է «Սարգսյանն ընդդեմ Ադրբեջանի» (Sargsyan v. Azerbaijan) և «Չիրագովն ու մյուսներն ընդդեմ Հայաստանի» (Chiragov and Others v. Armenia) գործերով վերջնական որոշումը: Առաջին գործի դեպքում պարտավորեցրել է Ադրբեջանին երեք ամսվա ընթացքում Սարգսյանների ընտանիքին վճարել 5000 եվրո, իսկ «Չիրագովն ու մյուսներն ընդդեմ Հայաստանի» գործով ՄԻԵԴ Մեծ պալատը վճռել է պարտավորեցնել Հայաստանին 3 ամսվա ընթացքում վճարել 5000 եվրո յուրաքանչյուր հայցվորին որպես նյութական և ոչ նյութական վնասի փոխհատուցում, ինչպես նաև 28,642.87 ֆունտ ստեռլինգ՝ դատական ծախսերի համար։