«Սասնա Ծռեր»-ից՝ Արամ Հակոբյանի կյանքին վտանգ է սպառնում
Հասարակություն«Սասնա Ծռեր» խմբի անդամ Արամ Հակոբյանը «Դատապարտյալների հիվանդանոց»-ից պետք է տեղափոխվի քաղաքացիական հիվանդանոց։ Այս մասին ԼՈւՐԵՐ.com-ի թղթակցի հետ զրույցում ասաց փաստաբան Դավիթ Գյուրջյանը՝ պնդելով, որ իր պաշտպանյալի նկատմամբ փետրվարի 8-ին պատշաճ բուժզննում չի իրականացվել, ուստի՝ հարկավոր է նոր հետազոտություն անցկացնել։
Փաստաբանի խոսքով՝ Արամ Հակոբյանի կյանքին վտանգ է սպառնում. «Կորոնոգրաֆիա կոչվող հետազոտությունը չեն իրականացրել, որի արդյունքում հնարավոր կլիներ պարզել դատական նիստի ժամանակ «Շտապ օգնության» բրիգադի ախտորոշումը ճի՞շտ էր, թե՞ ոչ:
Նախորդ տարվա նախաինսուլտային վիճակը մինչև այժմ չի անցնում: Բոլորս էլ ականատես ենք նրա վերջույթների թուլացմանը, խոսակցական ֆունկցիան որոշակի չափով խանգարված է: Հիմա էլ ախտորոշվում են հիպերտոնիա, հիպերտենզիա և մի շարք այլ հիվանդություններ, որոնցից որոշները ներառված են կառավարության 825 որոշման մեջ և պատժի հետագա կրման հետ անհամատեղելի են, քանի որ դրանց զարգացման աստիճանը գերազանցում է այս կամ այն աստիճանը»,- նկատեց նա:
Փաստաբանը նշեց՝ մինչ օրս արված բժշկական հետազոտությունները հիմք չեն տալիս համապատասխան մարմիններին դիմելու՝ իր պաշտպանյալին պատժի կրումից ազատելու համար. «Նոր հետազոտությունները կարող են հիմք դառնալ պատժի կրումից ազատելու համար։ Պարզելու դեպքում հնարավոր է համապատասխանեն այդ որոշման պահանջներին, ինչի կապակցությամբ փորձաքննության միջնորդությունը թողնվել է առանց քննության, քանի որ այդ ուղին փակ է մեզ համար»,-ասաց նա՝ ավելացնելով, որ կան հիվանդություններ, որոնց աստիճանը պարզված չէ:
Դավիթ Գյուրջյանն ասաց, որ պատրաստվում է դատարան միջնորդություն ներկայացնել՝ գործի վարույթը կասեցնելու վերաբերյալ, ինչը չկարողացավ անել այսօր «Սասնա Ծռերի» գործով դատական նիստը կարճ տևելու պատճառով։