«Մեղեդու Միքայելին» գետնին չթողեցին. տաշած քար է
Այսօր Կարեն Կարապետյանը պաշտոն «նվիրեց» ՀՅԴ-ական օլիգարխ, նախկին պատգամավոր Միքայել Մանուկյանին: Բանն այն է, որ Մանուկյանին խորհրդարանում չընդգրկելու ժամանակ լավ պաշտոն էին խոսք տվել, սակայն ինչ-ինչ պատճառներով այդ նշանակումը ձգձգվում էր:
Հիշեցնենք նաև, որ նկարիչ, լրագրող «Մեղեդու Միքայել»-ը («Մեղեդի» սրճարանը պատկանում է Միքայել Մանուկյանին) խորհրդարանում հայտնվել էր ոչ թե ընտրողների քվեների շնորհիվ, այլ որովհետև լուսահոգի Վահան Հովհաննիսյանն այն ժամանակ նշանակվեց Գերմանիայում ՀՀ դեսպան: Բացի դրանից, Մանուկյանը ևս մի առավելություն ուներ. նա ՀՅԴ Բյուրոյի ներկայացուցիչ Հրանտ Մարգարյանի սանիկն էր:
Հիշեցնենք նաև, որ Մանուկյանը ժամանակավոր նշանակվել էր «Հայանտառ» ՊՈԱԿ-ի տնօրենի պաշտոնում, սակայն այդ աթոռին չէր տեղավորվում. աթոռը նեղ էր և անհարմար: Նշանակումից հետո մի կարճ ընթացք Միքայել Մանուկյանը համեստորեն լռել էր, որովհետև իրեն խոստացել էին Բնապահպանության նախարարության անտառային պետական կոմիտեի նախագահի պաշտոնը, ինչն էլ այսօր վարչապետ Կարապետյանն իրականացրեց: Նկատենք նաև, որ պատգամավորության տարիներին Միքայել Մանուկյանը տոտալ միջակություն էր դրսևորում. երբեք աչքի չի ընկել օրենսդրական կարևոր նախաձեռնություններով, ելույթներով, հարցազրույցներով:
Թե ինչպես իրեն կդրսևորի այս պաշտոնում, թերևս հնարավոր չէ ասել, սակայն հայացք նետելով Մանուկյանի քաղաքական անցյալին՝ կարող ենք ենթադրել, որ այս պաշտոնում ևս Մանուկյանը չի կարող էական դերակատարում ունենալ, և, որ սա ինքնանպատակ նշանակում է՝ զուտ քաղաքական կամ քավոր-սանիկական պայմանավորվածությունից ելնելով: