Հույսներդ Կուտոյանի վրա մի՛ դրեք
ՀասարակությունՀՀ ԱԱԾ պետ Գեորգի Կուտոյանին քաղաքացի Լևոն Դռնոյանը բաց նամակ է հղել՝ խնդրելով ուշադրության կենտոնում պահել ԱԱԾ նախկին պետի տեղակալ Գուրգեն Եղիազարյանին՝ վերջինիս մեղադրելով այլ երկրի գաղութատիրական գաղափարների տարածման համար։
Դռնոյանն իր նամակում, մասնավորապես, նշում է, որ Հայաստանի անվտանգության ծառայության մի նախկին աշխատակից մեր երկրում առաջ է տանում այլ երկրի գաղութատիրական գաղափարներ, օգտվելով խոսքի ազատության իրավունքից, ուստի ԱԱԾ-ն պետք է պարզի Եղիազարյանի ով լինելը և բացահայտի՝ նա գաղտնի ծառայությունների աշխատակի՞ց է, թե՞ ոչ։
ԼՈւՐԵՐ․com—ի հետ զրույցում, Գուրգեն Եղիազարյանն, անդրադառնալով վերը նշված նամակին ու Դռնոյանի առաջ քաշած մի շարք դրույթներին, նշեց․ «Թող ինձ ների որպես գիտնական, գրող, բժիշկ ներկայացող պարոնը, բայց պետք է նշեմ, որ նրա նամակ-վերլուծությունն ինձ հիշեցրեց 1937 թվականին տրվող հաղորդումները, որոնք ուղղվում էին հատուկ ծառայություններին։ Չեմ հասկանում՝ տվյալ պարոնն ինչո՞ւ է այս նամակը գրել, միգուցե պատճառն այն է, որ օրեր առաջ սոցցանցերում հրապարակվեցին տարբեր արևմտյան գործակալների մասին տեղեկություններ, և դա նրան առիթ տվեց մտածելու, որ Եղիազարյանը հանդիսանում է հատուկ ծառայությունների գործակա՞լ։ Փիլիսոփային, սակայն, պետք է հայտնեմ, որ իրականում ես գործակալներ ձեռք բերող եմ և զրուցակիցներիս խոսքից կարողանում եմ հասկանալ՝ ով ինչով է զբաղվում»։
Խոսելով ռուսական գաղութատիրության պաշտպանության մասին իրեն ուղղված մեղադրանքների մասին՝ Եղիազարյանը նշեց․ «Դռնոյանը նման եզրակացություն արել է իմ այն պնդումից, որ 102-րդ ռազամբազայի առկայությունը մեր երկրում անհրաժեշտ է։ Այո՛, պաշտպանել և պաշտպանում եմ այդ ռազմաբազայի առկայությունը մեր երկրում և պնդում եմ, որ դա բխում է մեր երկրի անվտանգությունից։ Իսկ երբ նամակի հեղինակը մատնանշում է, որ Ռուսաստանն ուխտադրույժ կերպով Ադրբեջանին զենք է վաճառում, ապա ես նրան օրինակ եմ բերել, որ նույն ՌԴ-ն մեզ վաճառել է «Իսկանդեր», որը չի կարող համեմատվել Ադրբեջանին տված ԲՏՌ-ների և ԲՄՏ-ների հետ»,- ասաց նա՝ ընդգծելով, որ նամակի հեղինակը բացարձակ սխալ տեսանկյունից է ներկայացրել նաև իր տեսակետը «Սասնա Ծռերի» գործողությունների վերաբերյալ։
Գուրգեն Եղիազարյանը նաև նշեց, որ ԱԱԾ պետ Գեորգի Կուտոյանը նման հայտարարությանն ուշադրություն չի դարձնի, քանի որ նման նամակներ շատ են գրվում, իսկ նա, հավանաբար, ժամանակ, չի ունենա․ «Հակառակ պարագայում, եթե ուշադրություն դարձնի, ապա իր գործով չպետք է զբաղվի»,- ասաց Եղիազարյանը և հավելեց, որ այս նամակի հրապարակման նպատակն է Հայաստանում գործող դեսպանատների ուշադրությունը սևեռել իր անձի վրա։
Անդրադառնալով Դռնոյանի կոչին, որով նա խնդրում է ԱԱԾ-ին՝ ապահովել իր և իր ընտանիքի անվտանգությունը, Եղիազարյանը պատասխանեց․ «Սույն բժիշկ-փիլիոսփան նշում է, որ դժվարությամբ է նամակը հղել ԱԱԾ-ին։ Պետք է խորհուրդ տամ նրան՝ անտեղի չնեղվել, դժվարը սկսելն է, թանկագի՛ն պրոֆեսոր, հետո, ինքնաբերաբար, կստացվի, Դուք ոչ առաջինն եք, ոչ էլ՝ վերջինը, չէ՞ որ ես Ձեր վերջին զրուցակիցը չեմ, կլինեն նաև սուրճի այլ ընկերներ։ Մեկ խորհուրդ ևս՝ աշխատեք այլևս բաց նամակների ոլորտից զերծ մնալ, որ հետագայում անտեղի վախեր, տվայտանքներ և անքնություն չապրեք, ոչ էլ հետագայում հույսներդ Կուտոյանի վրա դնեք: Հիշե՛ք, դրանով կվտանգեք Պարկինսոնին»։
Աղավնի Սուքիասյան