Ինչ կապ ունի Չարբախցի Գեղամի կնոջ «փչացած» Mercedes-ը Նորատուսցի Ալիկի և մյուսների արյունոտ ռազբորկայի գործի հետ
Իրավունք«Առաջին լրատվական»-ը գրում է.
Երևանի ընդհանուր իրավասության դատարանի՝ Շենգավիթ վարչական շրջանի տարածքում գտնվող նստավայրի ապակեպատ դահլիճում Նելլի Բաղդասարյանի նախագահությամբ շարունակվեց 2016 թվականի նոյեմբերի 13-ին Չարբախում՝ «Լիա» գեղեցկության սրահի նկուղային հարկում կատարված աղմկոտ սպանությունների գործով դատական քննությունը:
Ամբաստանյալի աթոռին երեք ամբաստանյալներ են՝ Պետրոս Իսրայելյանը՝ «Չարբախցի Գեղամ» մականունով, Ալիկ Բանդուրյանը՝ «Նորատուսցի Ալիկ» մականունով, նաև՝ Արմեն Գասպարյանը, ով, ըստ մեղադրանքի, հանդիսանալով «Նորատուսցի Ալիկի» մտերիմը և մշտապես ուղեկցելով նրան, հաստատապես տեղեկացել է «Նորատուսցի Ալիկի» օժանդակությամբ ու դրդչությամբ «Չարբախցի Գեղամի», Գևորգ Ավետիսյանի և քննությամբ չպարզված այլ անձանց կողմից, խմբի կազմում դիտավորությամբ Մուշեղ Մուշեղյանի առողջությանը ծանր վնաս պատճառելու մասին, սակայն դրսևորել է հանցավոր անգործություն և նախապատրաստվող ծանր հանցագործության մասին դիտավորությամբ չի հայտնել իրավասու մարմիններին: Արմեն Գասպարյանին մեղադրանք է առաջադրվել ՀՀ քրեական օրենսգրքի 335 հոդվածի 1-ին մասով:
Մյուս երկու ամբաստանյալներին առաջադրված են ծանր մեղադրանքներ:
Պետրոս Իսրայելյանը՝ «Չարբախցի Գեղամը», մեղադրվում է խմբի կազմում դիտավորյալ սպանության համար՝ ՀՀ քրեական օրենսգրքի 104 հոդվածի 2-րդ մասի 7-րդ կետով, իսկ Ալիկ Բանդուրյանը՝ «Նորատուսցի Ալիկը», մեղադրվում է ՀՀ քրեական օրենսգրքի 38-112 հոդվածի 2-րդ մասի 6-րդ կետով՝ տուժողի առողջությանը ծանր վնաս հասցնելուն դրդելու, օժանդակելու համար, ինչի հետևանքով տուժողը մահացել է:
Ըստ մեղադրանքի՝ Նորատուսցի Ալիկը Չարբախցի Գեղամի հետ հեռախոսային խոսակցության ժամանակ «հորդորներ է հնչեցրել» Մուշեղ Մուշեղյանի վերաբերյալ. «Դրան մորթեք, սատկացրեք, մահակներով ոտքերը ջարդեք»: Այսինքն, ըստ մեղադրանքի, դրդել է Մուշեղ Մուշեղյանի առողջությանը ծանր վնաս պատճառելուն և «հորդորելու, շահագրգռելու եղանակով Պետրոս Իսրայելյանի մոտ Մուշեղ Մուշեղյանի նկատմամբ հանցավոր ոտնձգություն կատարելու վճռականություն է հարուցել»:
Ըստ մեղադրանքի՝ Ալիկ Բանդուրյանը դեպքի օրը՝ 2016 թվականի նոյեմբերի 13-ին, հանցավոր խմբին օժանդակել է՝ ծրագրված հանցագործությունը՝ Մուշեղյանի առողջությանը ծանր վնաս պատճառելու գործընթացը հեշտացնելու, այն «անխոչընդոտ» իրականացնելու եղանակով:
Պետրոս Իսրայելյանը՝ «Չարբախցի Գեղամը», ըստ մեղադրանքի, նախնական համաձայնության է եկել Գևորգ Ավետիսյանի ու քննությամբ չպարզված անձանց հետ և Ալիկ Բանդուրյանի օժանդակությամբ իրագործել է Մուշեղ Մուշեղյանի նկատմամբ ծրագրված ոտնձգությունը, սակայն հանդիպել է Մուշեղ Մուշեղյանի զինված դիմադրությանը՝ վերջինս անհրաժեշտ պաշտպանության վիճակում կրակոցներ է արձակել:
Մուշեղյանի դիմադրությունը հաղթահարելու, այդ ժամանակ ծագած՝ Մուշեղյանին սպանելու հանցավոր դիտավորությունը ավարտին հասցնելու նպատակով, ըստ մեղադրանքի, Պետրոս Իսրայելյանը խմբի կազմում Մուշեղյանին ուղղակի դիտավորությամբ սպանել է:
«Լիա» գեղեցկության սրահում կատարված «ռազբորկայի» արդյունքում 25-ամյա Գևորգ Ավետիսյանը՝ Պետրոս Իսրայելյանի բարեկամը, տեղում մահացել է:
38-ամյա Մուշեղ Մուշեղյանն ու 35-ամյա Արամ Պետրոսյանը վնասվածքներով տեղափոխվել են հիվանդանոց, որտեղ Մուշեղ Մուշեղյանը մահացել է:
Դատական նիստը բացվեց դատարանի դահլիճում, այնուհետև դատարանը պետք է արտագնա նիստի ընթացքում զննության ենթարկեր գործով վերջին իրեղեն ապացույցը՝ Պետրոս Իսրայելյանի կնոջ անունով գրանցված «Մերսեդես Բենց» մեքենան, որը ՃՈ ծառայության հատուկ պահպանվող տարածքից տեխնիկական պատճառներով՝ մեքենայի անսարքության հետ կապված, հնարավոր չէր եղել տեղափոխել դատարանի տարածք:
Զննությանը չէր մասնակցելու ամբաստանյալ Ալիկ Բանդուրյանը, քանի որ նա դեռևս սայլակով է տեղաշարժվում և առողջական վիճակով պայմանավորված՝ նպատակահարմար չէր նրան հասցնել զննության վայր: Զննությանը ներկա էր Ալիկ Բանդուրյանի շահերի պաշտպան, փաստաբան Երեմ Սարգսյանը:
Դատարանի դահլիճում ամբաստանյալ Պետրոս Իսրայելյանի շահերի պաշտպան Միհրան Պողոսյանը միջնորդեց, որ առողջական վիճակով պայմանավորված՝ զննության վայր մեկնել չի ցանկանում նաև իր պաշտպանյալը: Զննության ենթակա մեքենան Պետրոս Իսրայելյանի կնոջ՝ Անժելայի մեքենան է, Պետրոս Իսրայելյանը, ըստ պաշտպանի, առնչություն էլ չունի այդ մեքենային: Զննությանը ներկա էր Պետրոս Իսրայելյանի շահերի պաշտպան, փաստաբան Միհրան Պողոսյանը:
Զննության վայր գնալ չցանկացավ նաև գործով ազատության մեջ գտնվող ամբաստանյալ Արմեն Գասպարյանը՝ Բդոն՝ զննվող մեքենան իր հետ որևէ առնչություն չունենալու պատճառաբանությամբ: Զննության վայր չներկայացավ նաև Արմեն Գասպարյանի շահերի պաշտպանը:
ՃՈ ծառայության հատուկ պահպանության վայրը՝ այսպես ասած՝ «պլաշչադկան», առանց ծածկի մի տարածք է, որտեղ տվյալ գործով իրեղեն ապացույց ճանաչված «Մերսեդես Բենցը» արդեն տարիուկես կանգնած է բաց երկնքի տակ՝ առանց պաշտպանական որևէ միջոցի: «Հատուկ պահպանվող» է կոչվում տարածքը՝ ցանկապատված լինելու առումով, միգուցե, բայց այդ տարածքում կանգնած մեքենաները առնվազն՝ բնության երևույթներից և այլ արտաքին ազդեցություններից որևէ բանով պաշտպանված չեն:
Զննվող «Մերսեդես Բենցի» վրա ոչ մի կնիք չէր պահպանվել: Բայց այնպես էլ չէր, որ մեքենայի դռները բաց էին: Որպեսզի մեքենայի դռները բացվեն, հատուկ մասնագետ աշխատեց՝ «ճնշում չափելու» գործիք հիշեցնող ինչ-որ գործիքով: Ընդ որում՝ տվյալ մասնագետը աշխատելուց առաջ պահանջեց, որ զննության մասնակիցները հեռու կանգնեն ու հասու չլինեն իր աշխատանքի գաղտնի հնարքներին: Այս առումով չթույլատրվեց նաև տեսանակարահանումը:
Մասնագետի ջանքերից որոշ ժամանակ անց մեքենայի դռները բացվեցին: Իսկ որոշ չարչարանքներից հետո գործի գցվեց նաև մեքենայի շարժիչը:
Պետրոս Իսրայելյանի որդի Գոռը ցույց տվեց, թե մեքենայում որտեղ էին նստած եղել դեպքից հետո հիվանդանոց տարված, ծանր վիրավոր Գևորգ Ավետիսյանն ու Արամ Պետրոսյանը: Ընդ որում՝ Գևորգ Ավետիսյանի արյան հետքերը պարունակելու առումով էլ այս մեքենան ճանաչվել է որպես իրեղեն ապացույց:
Մեքենատիրոջ որդին նկատեց, որ մեքենան «հատուկ պահպանվող տարածքում» գտնվելու ընթացքում շատ է տուժել՝ վնասը կարող է երեք հազար դոլարից ավելի լինել:
Մեքենայի զննությունը ավարտելուց հետո մեքենայի դռները նորից փակվեցին ու կնիքվեցին, մեքենան դարձյալ ի պահ հանձնվեց ՃՈ ծառայությանը:
Դատարանը վերադարձավ դատական նիստերի դահլիճ ու շարունակեց նիստը դահլիճային պայմաններում:
Մանրամասները՝ սկզբնաղբյուր կայքում: