«Ասում են՝ հրաշքներ չեն լինում. ո՞նց չեն լինում». Սեֆիլյանի խոսքը՝ ազատության մեջ (տեսանյութ)
Հասարակություն«Ասում են՝ հրաշքներ չեն լինում, ո՞նց չեն լինում»,- այս մասին քիչ առաջ, Վերաքննիչ դատարանից դուրս գալուց հետո իր ելույթում ասաց արդեն նախկին քաղբանտարկյալ Ժիրայր Սեֆիլյանը:
Նա նշեց՝ թեև այսօր երկար չի խոսի, սակայն առաջիկայում հնարավորություն կունենա խոսել ժողովրդի հետ, քանի որ ասելիքը շատ է:
«Այս օրերին գրեթե ամեն օր՝ քաղբանտարկյալներն ազատության մեջ են լինում: Միշտ էլ հավատացել ենք, որ բոլորը՝ «Սասնա Ծռերը» և մյուսները ազատության մեջ են լինելու: Ինչպես մեր ժողովրդին Նիկոլ Փաշինյանի շնորհիվ հաջողվեց երկրում անցնցում փոփոխություններ անել, մենք պետք է այս օրերին ևս խոսենք և գործենք հնարավորինս զգույշ: Մենք մեր գործին չենք վնասելու և հաշված օրերի ընթացքում բոլորը կլինեն ազատության մեջ»,- ասաց Սեֆիլյանը:
Անդրադառնալով ՊՊԾ գնդի գրավման ժամանակ զոհված ոստիկաններին, Սեֆիլյանը նկատեց. «Մեր ցավն ու կարեկցանքը կուզեի հայտնել 2016թ. հուլիսյան իրադարձության, ապստամբության փորձի ժամանակ զոհ դարձածների հարազատներին: Դա բոլորիս ցավն է: Ես ոչ մի կասկած չունեմ, որ ոչ ոք «Սասնա Ծռերին» չի համարում հանցագործ, առավել ևս՝ ոճրագործ, չունեն այն եզրակացությունը, թե տղաները գնացել էին այդ քայլին՝ մարդասպանության նպատակով: Մենք ամենաշահագրգիռ կողմն ենք, որ բացահայտվի, թե այդ սպանություններն ինչպես տեղի ունեցան»,- հայտարարեց նա՝ հույս հայտնելով, որ նոր Հայաստանում կունենանք անկախ դատարան:
Հիշեցնենք՝ այսօր Վերաքննիչ քրեական դատարանում տեղի ունեցավ Ժիրայր Սեֆիլյանի, Գևորգ Սաֆարյանի, Հրայր Թոփչյանի, Սասունիկ Կիրակոսյանի, Գալուստ Գրիգորյանի, Ներսես Պողոսյանի վերաքննիչ բողոքների քննությունները:
Վերջիններս դատարանի դահլիճից ազատ արձակվեցին: Դատարանը ոչ թե արդարացրեց նրանց, այլ նրանց խափանման միջոցը փոխեց ստորագրությամբ չհեռանալու մասին:
Տեսանյութը՝ factor.am-ի: