Այս պահին չկա օդային տագնապի ազդանշան տալու անհրաժեշտություն, բայց հարկ եղած դեպքում այն լինելու է ոչ թե փորձնական, այլ իրական. Ցոլակյան

Հայաստանի Հանրապետության տարածքում այս պահին չկա օդային տագնապի ազդանշան տալու անհրաժեշտություն, բայց հարկ եղած դեպքում այն լինելու է ոչ թե փորձնական, այլ իրական: Այս մասին Ֆեյսբուքի իր էջում գրել է ՀՀ Արտակարգ իրավիճակների նախարար Ֆելիքս Ցոլակյանը:

«Սիրելի՛ հայրենակիցներ, այս օրերին մեր հասարակության որոշակի շրջանակներում լուրեր շրջանառվեցին, թե հնարավոր է փորձնական օդային տագնապի ազդանշան լինի: Պաշտոնապես հայտարարում եմ՝ այս պահին չկա օդային տագնապի ազդանշան տալու անհրաժեշտություն, բայց հարկ եղած դեպքում այն լինելու է ոչ թե փորձնական, այլ իրական: Չնայած նրան, որ այս պահին չկա դրա անհրաժեշտությունը, բայց հատկապես սահմանամերձ շրջանների մեր հայրենակիցներին կոչ եմ անում թարմացնել գիտելիքները՝ վերհիշելով օդային տագնապի ժամանակ վարքագծի պարզագույն կանոնները»,- գրել է Ցոլակյանը:

Նախարարը նշել է, որ արտակարգ իրավիճակների նախարարությունն ունի իրազեկման անհրաժեշտ բոլոր միջոցները՝ «Օդային տագնապ»-ի դեպքում բնակչությանն այդ մասին օպերատիվ տեղեկացնելու համար:

«Հարկ եղած դեպքում իրազեկումն իրականացվելու է էլեկտրաշչակներով, բջջային հեռախոսներին ուղարկվող կարճ sms հաղորդագրությունների տեսքով և զանգվածային լրատվության միջոցներով: Խնդրում և հորդորում եմ բոլորիդ հետևել բացառապես պաշտոնական տեղեկատվությանը»,- հավելել է Ֆելիքս Ցոլակյանը:

Այս թեմայով Մենք չենք կարող մեզ շռայլություն թույլ տալ եւ շարունակել հուսալքված ապրել. Ֆելիքս Ցոլակյան Ֆելիքս Ցոլակյանը հրաժեշտ է տվել ԱԻՆ աշխատակիցներին (տեսանյութ) Ֆելիքս Ցոլակյանը հրաժարականի դիմում է ներկայացրել Խոսնակները` Դավիթ Տոնոյանի, Ֆելիքս Ցոլակյանի և Ռուստամ Բադասյանի ազատման դիմումների մասին ԱԻ նախարարը հանձնարարել է բոլոր գործողությունները համաձայնեցնել Տավուշում ԶՈՒ ղեկավար կազմի հետ (տեսանյութ) Ֆելիքս Ցոլակյանը շնորհավորական ուղերձ է հղել Բուժաշխատողի օրվա առթիվ