Օրենքը կա, բայց չի՞ գործում

Սպանդանոցներ կառուցած գործարարները դժգոհում են՝ մեծ գումարներ են ներդրել, բայց քանի որ օրենքը չի իրագործվում՝ գումար չեն կարողանում աշխատել և կագնած են փակվելու եզրին։ Նրանց խոսքով՝ այն մսավաճառներն ու անասնապահները, որոնք մեկ տարի առաջ բողոքում էին սպանդանոցների սակավությունից,  շարունակում են անասունների բակային մորթ կազմակերպել և վաճառել։ Ստացվում է՝ օրենքը մնում է սևով սպիտակի վրա գրված մի բան, որը չի գործում։ ԼՈՒՐԵՐ․com-ի հետ զրույցում Սննդամթերքի անվտանգության տեսչական մարմնի ղեկավար Գեորգի Ավետիսյանը սպանդանոցներ կառուցած գործարարներին խորհուրդ տվեց՝ ճիշտ կազմակերպել աշխատանքը, որպեսզի եկամուտ ստանան․ «Դժգոհություններ, իհարկե, կան, որ իրենց մոտ մորթ չեն իրականացնում, բայց անցած տարվա ընթացքում բոլոր մարզպետարաններում ունեցել ենք հանդիպումներ ներդրողների, ֆերմերների, մսավաճառների հետ և ասել ենք, որ չնստեն սպասեն, որ իրենց միս բերեն, այլ պետք է գնան գյուղացիների հետ զրուցեն, խնդրեն, լավ առաջարկություններ անեն, շահագրգռեն, որ իրենց մոտ իրականացնեն մորթը։ Մշտապես ասել ենք, եթե ուզում եք լավ աշխատել, եկամուտ ունենալ, դուք պետք է գնաք գյուղացուց գնեք և շուկան ապահովեք մսով։ Այսինքն՝ գյուղացուն նեղություն տալը պետք է հասցնեն մինիմալի։ Սպանդանոցները շատացել են, մրցակցությունը մեծացել է, հետևաբար մնալու և աշխատելու են այն սպանդանոցները, որոնք գյուղացու հետ ճիշտ են աշխատում։ Ճիշտ եք ասում, երբ նախորդ տարի աղմուկ բարձրացավ, որ սպանդանոցների քանակը քիչ է, ինչ-որ տեղ բողոքը օբյեկտիվ էր, բայց քանի որ հիմա կա 70 գործող սպանդանոց, դրանցից 10-20-ը բողոքելու են, կամ ժամանակի ընթացքում փակվեն, որովհետև չեն դիմանալու մրցակցությանը։  Շատ սպանդանոցներ մեծ եկամուտներ են ունենում, որովհետև ճիշտ են աշխատում»,- ասաց Ավետիսյանը՝ նշելով, որ ՍԱՏՄ-ն իր գործառույթը կատարելիս յուրաքանչյուր ստուգման ժամանակ պարտադիր ստուգում է 5-րդ ձևի առկայությունը։ 

Նկատենք, որ նախորդ տարեսկզբին, երբ պարտադրվեց սպանդանոցային մսի վաճառքն ու 5-րդ ձևի առկայությունը մեծ հնչեղությամբ գովազդվում էր, որ այսինչ սուպերմարկետը կամ խանութն անցել է սպանդանոցային մսի վաճառքին, ինչը հիմա չկա։ Այս հանգամանքը ՍԱՏՄ ղեկավարը բացատրում է նրանով, որ հիմա խանութները շատ են, իսկ այն ժամանակ քիչ էին, հետևաբար այդ կերպ փորձում էին խրախուսել, որ այսինչ տեղում վաճառվում է սպանդանոցային միս։

Ինչ վերաբերում է հարցին, թե մսավաճառների ու գյուղացիների բողոքի ակցիաները ևս կարճ ժամանակ անց դադարեցին, արդյոք դա չի՞ ենթադրում, որ շարունակում են ներքին կարգով մորթ իրականացնել ու իրացնել շուկայում՝ Ավետիսյանը պատասխանեց․ «Չենք բացառում, որ մեր ստուգումներից հետո գուցե ինչ-որ մախինացիաներ են անում և ոչ սպանդանոցային միս են վաճառում։ 170 տեսուչ չի կարող լինել ամեն տեղ, հետևաբար պետք է նաև հանրային ինքնագիտակցություն լինի և սպառողները պահանջատեր լինեն, որ իրեն ցույց տան 5-րդ ձևը»,- նշեց նա։

Նրա խոսքով՝ վերահսկող մարմնի գործառույթը չի հետաքրքրվել սպանդանոցների հասանելիություն կա, թե ոչ․ «Մենք ունենք իրավական ակտ, գնում, ստուգում ենք սպանդանոցային մսի առկայությունը։ Իսկ այն, թե ունեն գործ, թե չունեն, ուզում են աշխատել, թե ոչ, դա մեր գործառույթի մեջ չի մտնում և չի հետաքրքրում»,- ասաց Գեորգի Ավետիսյանը։

Հիշեցնենք, որ 2020թ․ հուլիսի 1-ից ուժի մեջ է մտել պարտադիր սպանդանոցային մորթի կազմակերպման կառավարության որոշումը: 

Սոնա Հարությունյան

Այս թեմայով Արայիկ Հարությունյանը վերջապես կհասնի նպատակին. ո՞վ կնշանակվի ՍԱՏՄ ղեկավար. «Փաստ» ՍԱՏՄ-ն հրապարակել է ձվի արտադրության և իրացման շուկայի վերահսկողության միջանկյալ արդյունքները Արարատի կոնյակի գործարանում վերահսկողություն կիրականացվի Գյումրիում հանրային սննդի օբյեկտը կվերսկսի աշխատանքը․ ՍԱՏՄ ՍԱՏՄ-ն հորդորում է խուսափել տնային պայմաններում սննդամթերքի պահածոյացումից Սպառողի պաշտպանվածությունն առաջին հերթին տեղեկացվածություն է սեփական իրավունքների մասին. ՍԱՏՄ Աշխատանքից ազատվել է ՍԱՏՄ ղեկավարի տեղակալ Դավիթ Կարապետյանը ՌԴ լիազոր մարմինը խնդրել է պարզել խախտման հանգամանքները․ ՍԱՏՄ-ն՝ ձկնկիթի հետ կապված խնդրի մասին ՀՀ-ում աճեցված մշակաբույսերում հայտնաբերվել են պեստիցիդների մնացորդային նյութերի սահմանային թույլատրելի քանակության գերազանցման դեպքեր. ՍԱՏՄ «Ջերմուկ գրուպ»-ն աշխատում է սահմանված նորմերին համապատասխան. ՍԱՏՄ