ԲՀԿ-ն չի մասնակցի քվեարկությանը
ՔաղաքականԱզգային ժողովի այսօրվա նիստում ընդգրկված է ԲՀԿ-ական պատգամավոր Վարդան Օսկանյանին անձեռնմխելիությունից զրկելու հարցը:
Նիստի ընթացքում ԱԺ ԲՀԿ խմբակցության անդամ Նաիրա Զոհրաբյանն ասաց. «Մենք հասկացանք, որ մեր Գլխավոր դատախազը և իրավապահները խիստ հանձնառու են «Սիվիլիթաս»-ի եւ Հանսթմանի շահերը պաշտպանելու հարցում, և հուսով ենք, որ հիմնադրամն ու Հանսթմանը առաջիկայում շնորհակալական ուղերձ կհղեն իրավապահներին ու դատախազին։ Մենք որևէ հարց չուղղեցինք Գլխավոր դատախազին, քանի որ մեզ համար միանշանակ է, որ սա քաղաքական կոմպոնենտ է պարունակում եւ ուղղված է Օսկանյանի եւ ԲՀԿ-ի դեմ: Ձեզ բոլորի համար էլ ակնհայտ է այդ քաղաքական կոմպոնենտի բոլոր հիմքերը: Վերաբերմունքը ԲՀԿ-ի հանդեպ սկսվեց մեր վերջին համագումարի ընթացքում, եւ մենք պարբերաբար ականատես ենք եղել նման գործելաոճի: Սա քաղաքական պատվեր է Բարգավաճ Հայաստանի դեմ»։
Ըստ Նաիրա Զոհրաբյանի՝ ԲՀԿ-ի հետ որևէ մեկը իրավունք չունի խոսել նման քաղաքական պատվերների ձեւով: Վերջինս նաև հայտարարեց, որ ԲՀԿ-ի պատգամավորներն այս քննարկումից հետո կլքեն նիստերի դահլիճը և չեն մասնակցի քառօրյա նիստերին, իսկ ինչ վերաբերում է հետագա նիստերին մասնակցելուն, այդ հարցը դեռ կքննարկվի։ Բացի դրանից՝ ԲՀԿ պատգամավորները չեն մասնակցի քվեարկությանը, բայց նաև նշեց, որ «Կենտրոն» հեռուստաընկերության տեսախցիկները ֆիքսելու են քվեարկության ողջ ընթացքը։
Քաղաքական ֆարսը չլեգիտիմացնելու համար նա կոչ արեց մյուս ուժերին էլ չմասնակցել քվեարկությանը։
Նաիա Զոհրաբյանի ելույթի ավարտից հետո ԱԺ նախագահ Հովիկ Աբրահամյանը նկատեց, որ վերջինս որոշ դիտարկումներում օբյեկտիվ չէր։