ԱԻՆ-ը հաշվետվություն է ներկայացրել Կառավարությանը
ՀասարակությունՀՀ կառավարությունում մեկնարկել է ՀՀ պետական կառավարման մարմինների գնահատված կատարողականների, 2012 թ. գործունեության միջոցառումների ծրագրի ու գերակա խնդիրների կատարման հաշվետվությունների քննարկումը։ 2012 թ. ընթացքում կատարված աշխատանքների ու դրանց արդյունքների վերաբերյալ հաշվետվությամբ հանդես է եկել նաև ՀՀ արտակարգ իրավիճակների նախարար Ա. Երիցյանը։
2012 թ. ԱԻ նախարարության գերակա խնդիրներն էին.
- մթնոլորտայի երևույթների կառավարման և ռադիոլոկացիոն դիտարկումների իրականացման նպատակով մթնոլորտի և մթնոլորտային երևույթների վրա ակտիվ ներգործության ծրագրի մշակում և հաստատում.
- Ճգնաժամային կառավարման կենտրոնում մարդուն հրատապ օգնության համապետական համակարգի «911» դիսպետչերական ծառայության գործարկում։
Առաջին կետի վերաբերյալ մշակվել է համապատասխան ծրագիր, որը ներկայացվել է ՀՀ կառավարություն։ Զգալի աշխատանք է կատարվել նաև «911» ծառայության զարգացման ուղղությամբ' վերականգնվել է ՀԱԷԿ-ի հետ ուղիղ հեռախոսակապը, ներդրվել է տարածաշրջանում եզակի ճարտարապետական շինությունների և տարածքների հակահրդեհային ավտոմատացված վերահսկման և ազդարարման համակարգ, հրշեջ և փրկարարական 100 մեքենայի վրա տեղադրվել են GPS սարքեր, հիմնվել է մարդկանց զանգվածային կուտակման վայրերի տեսավերահսկման շուրջօրյա համակարգ, որին միացվել են Երևանի մետրոպոլիտենի կայարաններում տեղադրված 164 տեսախցիկները, համալրվել են տեղեկատվական բազաները։ ՃԿԿ-ում ներդրվել է նաև մայրաքաղաքում հասցեների որոնման և տեղորոշման ծրագրային համակարգ։
Անցյալ տարի շահագործման է հանձնվել ԱԻՆ համաբուժարանը, որը գործունեության 4 ամիսների ընթացքում սպասարկել է ավելի քան 600 ծառայողի և նրանց ընտանիքների անդամների։
Մթնոլորտային երևույթների վրա ակտիվ ներգործության ծառայության գործունեության բարելավման նպատակով ձեռք է բերվել 9 շարժական, 15 ստացիոնար հակակարկտային կայան և դրանց գազալցավորման համար նախատեսված 2 բեռնատար աավտոմեքենա.
Ձեռք է բերվել 55 տեղանոց, 6 տոննա տարողությամբ բեռնախցիկով ավտոբուս, որը հագեցվել է փրկարարական սարքավորումներով և աշխատանքների կառավարման համապատասխան պայմաններով, ինչպես նաև ծանրաքարշ ամենագնաց (ջրլող, լեռնագնաց, ճահճագնաց, թրթուրավոր՝ 12 տոննա տարողությամբ), որը վերազինվել է դժվարամատչելի վայրերում հրդեհաշիջման բաքերով և սարքավորումներով։
Սեյսմիկ դիտացանցի արդիականացման և վերազինման նպատակով հայ-ճապոնական ծրագրով Երևանում տեղակայվել է 5 թվային սեյսմիկ դիտակայան, Ֆրանսիայի սեյսմոլոգիական ծառայության աջակցությամբ Հայաստանի տարածքում տեղադրվել է 9 սեյսմիկ դիտակայան, ԱԷՄԳ-ի աջակցությամբ ձեռք է բերվել 6 նորագույն սեյսմիկ կայան՝ ՀԱԷԿ-ի շրջակայքում տեղակայելու համար, իսկ ՄԱԶԾ օժանդակությամբ' 15 հորատանցքերի վրա տեղադրվելիք ուժեղ երկրաշարժերի կանխատեսման թվային սարքավորումներ։
Ճգնաժամային կառավարման կենտրոնում և «911» ծառայությունում ստեղծվել է 30 հաշմանդամի աշխատատեղ, և 11 հաշմանդամ ներկայումս փորձաշրջան է անցնում է։
Ձեռք է բերվել վտանգավոր արտադրական օբյեկտների փորձաքննության համար նախատեսված շարժական լաբորատորիա։
Լուսակերտի ուսումնական կենտրոնում վերագործարկվել է ուսումնական վարժահրապարակը և լսարանային ֆոնդը։
ՀՀ կառավարության անդամները և կառավարությանն առընթեր մարմինների ղեկավարներն անդրադարձել են հաշվետու տարում կատարված աշխատանքներին և իրականացված միջոցառումներին։ Հաշվետվությունները լսելուց հետո կառավարության ղեկավարն անդրադարձել է 2012 թ. ըստ գերատեսչությունների տրված հանձնարարականների կատարողականներին: