Ինչո՞ւ է մարտի 8-ին ծնված Անդոն տխուր լինում տարեդարձի օրը
ՀասարակությունԹեև այսօր բոլոր շնորհավորանքներն ու մաղթանքներն ուղղված են կանանց և աղջիկներին, դերասան, հումորիստ Անդոն ևս բազմաթիվ շնորհավորանքներ է ստանում՝ սկսած գիշերվանից, ընդ որում՝ առանց կատակի :) Այսօր նա նշում է իր ծննդյան օրը:
esyes.am-ի հետ զրույցում Անդոն ասաց, որ շատ է սիրում այս օրը, սակայն ոչ այն պատճառով, որ իր տարեդարձն է: Դերասանը դեմ չէ, որ իր տարեդարձի տոնը միանա կանանց տոներին: «Շատ եմ սիրում այն օրը, երբ ծնվել եմ: Կանանց, մայրերին նվիրված այս գեղեցիկ օրը լույս աշխարհ է եկել մի շատ գեղեցիկ անձնավորություն՝ ես:),- ասաց Անդոն և հավելեց, որ կանանց տոներին ծնվելու հետ կապված որևէ կարծրատիպ չունի, պարզապես չի սիրում իր տարեդարձի օրը, քանի որ մեկ տարով էլ է մեծանում: -Ներքուստ միշտ շատ տխուր եմ լինում այսօր, թեև արտաքուստ շատ ուրախ եմ և շրջապատում դա չեն զգում»:
Անդոն հայտնեց, որ այսօր ներկայացում ունեն Երևանի պետական կամերային թատրոնում, խաղալու են «Կառավարական համերգը»:
«Ամեն տարի այս օրը ներկայացում ենք ունենում ու տարեդարձս թատրոնում եմ նշում՝ կանանց տոների հետ միասին: Պատկերացրեք, ինչ ուրախ ու լավ է անցնում,- ասաց Անդոն ու հավելեց, որ սովորաբար իր տարեդարձի համար մեծ երեկույթ չի կազմակերպում: -Խնդիրը ֆինանսի մեջ չէ: Ֆինանս ունենք, աշխարհը չունի, ինչ պատգամավոր, ինչ օլիգարխ…:) Պարզապես չեմ սիրում»:
Դերասանին հարցուփորձ արեցինք նաև կնոջից ստացած նվերի մասին, սակայն պարզվեց, որ Մերին դեռևս չի մատուցել իր նվերը, իսկ ահա Անդոն արդեն հոգացել է ընտանիքի իգական սեռի անդամների նվերի մասին. նրանցից յուրաքանչյուրին նվիրել է շապիկ, որ վրա գրված է ՝ Մարտի 8, ստորև տպված է նրա դստեր՝ Էլենի լուսանկարն ու գրված՝ Այս ծաղիկը՝ Ձեզ: «Նվերը որպես այդպիսին մեծ չէ, սակայն իր նշանակությամբ ինձ համար շատ մեծ է,- ասաց Անդոն ու ծիծաղելով հավելեց,- տեսնեմ իրենք ինձ ինչ են նվիրելու: Թող փորձեն, այսքանից հետո վատ նվեր տալ:)»: