ԱՄՆ-ի Հայ դատի գրասենյակը օգնություն է պահանջել Ջավախքի հայերի համար
ՎրաստանԱմերիկայի Հայ դատի հանձնախումբը դիմել է ԱՄՆ-ի Կոնգրեսին՝ խնդրանքով՝ ԱՄՆ-ի կառավարության կողմից Վրաստանին հատկացվող օգնության 10%-ն ուղղել պատմականորեն հայերով բնակեցված Սամցխե Ջավախեթի շրջանին:
ԱՄՆ-ում պաշտոնական այցով գտնվող Վրաստանի խորհրդարանի խոսնակ Դավիդ Ուսուպաշվիլին «Կարնեգի» հիմնադրամում իր ելույթի ժամանակ մեկնաբանել է այդ խնդրանքը՝ նշելով. «Սամցխե Ջավախեթին միայն Վրաստանի շրջաններից մեկն է: Ես, իհարկե, ուրախ կլինեմ նրան հատկացվող օգնության համար, սակայն եթե դա չվնասի Վրաստանի այլ շրջաններին: Մենք նաև այլ շրջաններ ունենք, ինչպես Քվեմո-Քարթլին, Մեգրելին, որոնք նույնպես կարիքներ ունեն, որոնք լուծում են պահանջում: Ես չեմ կարծում, որ այս շրջաններին օգնություն հատկացնելիս պետք է առաջնորդվել որևէ այլ սկզբունքով, քան այդ շրջաններում մարդկանց ունեցած կարիքներն են: Եվ Վրաստանն ինքը պետք է առաջին հերթին հոգ տանի իր քաղաքացիների մասին իր միջոցներով, ինչը, իհարկե, արդարացի կլիներ:
Ես կարծում եմ, որ մենք շատ խնդիրներ ունենք: Սամցխե Ջավախեթին շատ դինամիկ և բարդ շրջան է: Պետք է շատ զգույշ լինել այնտեղ որևէ ուղղությամբ շարժվելիս, քանի որ կա վատ զարգացման հնարավորություն այդ շրջանում, ինչը լավ ավարտ չի ունենա ո՛չ Վրաստանի և ո՛չ էլ նրա հարևան երկրների համար»,-Ուսուպաշվիլիի խոսքերը մեջբերում է Грузия-Online-ը: