«Մայդանի հայաստանյան վկաներ, տեսա՞ք՝ ինչ պատուհաս է դառնում գրանտակերների ու ծայրահեղականների կողմից հրահրված հեղաշրջումը»
ԲլոգոսֆերաԿոնստանտին Տեր Նակալյանը ֆեյսբուքյան իր էջում գրել է.
«Ուկրաինայում սկսվեց քաղաքացիական պատերազմը: Սլավյանսկում արդեն փողոցային մարտեր են, և պաշտոնական ու ոչ պաշտոնական աղբյուրները հաղորդում են զոհերի ու վիրավորների մասին՝ երկու կողմերից էլ:
Հիմա Սլավյանսկ փորձում են ծանր մարտական տեխնիկա մտցնել, իսկ ցուցարարները պատրաստվում են կենդանի վահան կազմել և թույլ չտալ դա: Ռուսական աղբյուրների փոխանցմամբ՝ պաշտոնական Կիևը Սլավյանսկի գրոհը կազմակերպել է երկրի Արևմուտքից բերված ռազմական ու ոստիկանական ստորաբաժանումներով, իսկ համացանցում հայտնվել են տեսանյութեր, թե ինչպես են Դոնեցկի օդանավակայանում անհայտ պատկանելիության զինված խմբեր բեռնվում մեքենաների մեջ՝ օտարերկրյա զինվորական համազգեստներով:
Եթե այսպես շարունակվի, ապա հաշված ժամեր անց արյունահեղությունը կտարածվի նաև հարավ-արևելքի այլ քաղաքների վրա, իսկ եթե հաշվի առնենք, որ անգամ Ավակովն է իր ֆեյսբուքյան էջում անզորության կոչեր անում, որ չեն կարողանում Աջ սեկտորի մարտիկներով բեռնված ավտոբուսները հեռու պահել Խարկով ու Դոնեցկ մտնելուց, ապա վախենամ, որ արդեն երեկոյան տասնյակ, եթե ոչ հարյուրավոր զոհեր լինեն:
Ցավալին այն է, որ սրանք դեռ միայն առաջին ծիծեռնակներն են, ու Ուկրաինան նոր-նոր է իր մաշկի վրա սկսում զգալ, թե ինչ էր իրականում Մայդանը ու ինչի է այն բերելու: Խնդիրը այն է, որ եթե փետրվարի 17-ին, երբ առաջին անգամ մեծ մասշտաբներով արյուն թափվեց, հնարավոր էր այս չարիքը կասեցնել հարաբերականորեն ասված «Փոքր արյունով», եթե Յանուկովիչը արտակարգ իրավիճակ մտցներ ու ճզմեր Մայդանը այնպես, ինչպես հիմա են Մայդանի արդյունքում իշխանության եկած ուժերը, փորձում ճնշել հարավ-արևելքը, ապա հիմա դա հնարավոր չէ, որովհետև հիմա ճգնաժամն ավելի է էսկալացվել, իսկ նախկինում մահակներով ու ինքնաշեն զենքերով զինված ցուցարարները արդեն զինված են ինքնաձիգերով, գնդացիրներով ու նռնականետներով:
Հ.Գ. Մայդանի հայաստանյան վկաներ, տեսա՞ք՝ ինչ պատուհաս է դառնում պետության համար գրանտակերների ու ծայրահեղականների կողմից հրահրված ու կատալիզացված հեղաշրջումը: Ինձ ուղղակի հետաքրքիր ա, թե քանի հազար հոգի պետք ա զոհվի Ուկրաինայում, որ դուք վերջապես խոստովանեք, որ Մայդանը արհավիրք էր»: