Կոմունիստները նշում են հոկտեմբերյան հեղափոխության 94–ամյակը
ՔաղաքականԱյսօր՝ նոյեմբերի յոթին, Հայաստանի կոմունիստական կուսակցությունը նշում է հոկտեմբերյան սոցիալիստական հեղափոխության 94–րդ տարեդարձը։ Այդ առիթով «Հենարան» ակումբի հյուրն էր Հայաստանի կոմունիստական կուսակցության կենտկոմի առաջին քարտուղար Ռուբեն Թովմասյանը։
Դեռ ասուլիսից առաջ Թովմասյանին զանգում էին ու շնորհավորում մեծ հեղափոխության առիթով, իսկ նրա բջջային հեռախոսի զանգի երաժշտությունը հանրահայտ «Վստավայ ստրանա օգրոմնայա» երգն էր։ Հարցին, թե արդյոք այդ երգը դրվել է այս տոնի առիթով, թե՞ մշտապես իր հեռախոսազանգն է, Թովմասյանն ասաց, որ այդ երաժշտությունը միշտ է իր հեռախոսում ու հավելեց, որ դա պատերազմի տարիներին գրված հիանալի երգ է և որ հենց այս օրն է հայ ժողովուրդը տոնել հոկտեմբերյան հեղափոխությունը, որը իննսուն թվականից կրակն ընկավ ու դուրս չի գալիս։ Իսկ հետոյի համար խնդրեց դիմել ոչ թե պարոնով, այլ ընկերով։
«Քանի գնում, այնքան նսեմացնում են բուրժուաները մեր պատմական մեծ հեղափոխությունը։ հեղափոխության քսաներորդ տարին միևնույն է ամենամեծ իրադարձություն է։ Այն մարդկանց բերել էր հավասարություն, ստեղծվեց մի պետություն, որը պատկանում էր ժողովրդին։ Այնպիսի ազդեցություն էր թողել աշխարհի վրա, որ մյուս երկրներն էլ էին ուզում այդպես ապրել»,– ասաց Թովմասյանը։
«Մտածում եք, որ հեղափոխությունը ջարդարարություն է, բայց բոլշևիկյան կուսակցությունը կարողացել էր նախ փոխել մարդուն, ապա դիմել զինված ուժերին ու դա խլեց միայն հինգ մարդու կյանք»,– ավելացրեց կուսակցության առաջին քարտուղարը։