Ադրբեջանը կնվազեցնի նավթի արտահանումը. ՕՊԵԿ
ԱշխարհՆավթ արտահանող երկրների միության' ՕՊԵԿ-ի նոր զեկույցում ասվում է, որ 2015 թվականին Ադրբեջանից նավթի արտահանման ծավալների նվազեցում է կանխատեսվում: Այն կնվազի համաշխարհային շուկայում, հատկապես, ադրբեջանական «Ազերի Light» տեսակի նավթի նկատմամբ աճող մրցակցության պատճառով:
Ինչպես հաղորդում է «Արմենպրես»-ը' վկայակոչելով oxu.az լրատվական կայքը, կազմակերպությունը գտնում է, որ 2015 թվականին Ադրբեջանից նավթի արտահանման ծավալը, անցյալ տարվա համեմատ, օրական 10 հազար բարելով կնվազի:
«Կրճատում է սպասվում: Չնայած նրան, որ ընթացիկ տարվա 9 ամսում Ադրբեջանի գլխավոր հանքահորերից, «Ազերի-Չիրաղ-Գյունեշլի»-ից արդյունահանվող նավթի ծավալը 4 տոկոսով աճել է, Ադրբեջանից նավթի արտահանման ծավալի կրճատում է սպասվում»,- ասվում է ՕՊԵԿ-ի նոր զեկույցում:
Ըստ ՕՊԵԿ-ի՝ ադրբեջանական նավթի վաճառքի ծավալները կրճատվելու են՝ կապված Մերձավոր Արևելքից կատարվող այլընտրանքային մեծ առաջարկի և եվրոպական նավթավերամշակման գործարաններում նավթի պաշարների մեծ կուտակումների հետ:
Bloomberg-ն էլ իր հերթին հայտնում է, որ նավթի համաշխարհային շուկա Իրանի վերադարձից հետո սև ոսկու գինը կտրուկ կնվազի: Համաշխարհային բանկի փորձագետներն էլ կանխատեսում են, որ նման դեպքում նավթի մեկ բարելի գինը կընկնի ևս 10 դոլարով:
Երեկվա դրությամբ՝ Լոնդոնի ապրանքային սակարանում ադրբեջանական «Ազերի Light» տեսակի նավթի մեկ բարելի գինը սահմանվել է 46,71 դոլար, Brent տեսակի նավթի մեկ բարելի գինը՝ 44,77 դոլար:
Նավթի համաշխարհային գների և ադրբեջանական ազգային արժույթի՝ մանաթի փոխարժեքի անկման պատճառով Ադրբեջանի տնտեսությունը հայտնվել է ճգնաժամի մեջ. բազմաթիվ պետական և մասնավոր հաստատություններ չեն կարողանում վճարել աշխատակիցների աշխատավարձերը: Փակվել են նավթարդյունաբերության մի շարք ձեռնարկություններ, պետական և մասնավոր հաստատություներ, տասնյակ հազարավոր աշխատավորներ գործազուրկ են դարձել, Ադրբեջանի տնտեսական աճն օրեցօր նվազում է, միջազգային վարկանիշային գործակալությունների համաձայն' ադրբեջանական բանկերը կանգնած են ռիսկի սահմանին, այս տարվա ընթացքում Ադրբեջանն արդեն 6,7 մլրդ դոլար է կորցրել, երկրի բյուջեն դեֆիցիտային է դարձել, եկող տարվա բյուջեն անցյալ տարվա պետբյուջեից մոտ 2 անգամ փոքր է սահմանվել:
Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձևավորվում է էներգակիրների արտահանումից ստացվող եկամուտների հաշվին: