Իսպանիայում սկսվել է պատմական դատավարությունը՝ թագավորի քրոջ մասնակցությամբ
ԱշխարհԲալեարյան կղզիներում հունվարի 11-ին սկսվել է ֆինանսական չարաշահումների գործով դատավարությունը, որին մասնակից է Իսպանիայի թագավորի քույրը՝ արքայադուստր Քրիստինան: Նիստը բացվել է Պալմա դե Մայորկա քաղաքի պետական վարչակազմի դպրոցի շենքում: Սույն գործին, որն ամենաաղմկահարույցներից մեկն է Իսպանիայի ամբողջ պատմության ընթացքում, մասնակից է ևս 17 մարդ, տեղեկացնում է «Արմենպրես»-ը:
Արքայադուստրը դատավարության է ժամանել առաջիններից մեկը՝ իր ամուսնու՝ Ինյակի Ուրդանգարինի հետ: Սպասվում է, որ դատարանը վճիռ կկայացնի ընթացիկ տարվա հունիսի 30-ին:
Դատախազության տեղեկատվության համաձայն՝ Նոոսի ինստիտուտ հասարակական կազմակերպությունը, որի ղեկավարության կազմում էին Ուրդանգարինը և նրա նախկին գործընկեր Դիեգո Տոռեսը, սոսկ քողարկում է եղել մի խումբ մարդկանց կողմից Բալեարյան կղզիների և Վալենսիայի բյուջեներից խոշոր գումարների ստացման և հետագայում դրանց յուրացման համար:
Ինչ վերաբերում է թագավորի քրոջը, դատախազը հանդես է եկել նրա նկատմամբ գործի կասեցման օգտին, քանի որ մեղադրող կողմի հիմնական փաստարկն այն է, որ Քրիստինան իբր կարող էր իմանալ ամուսնու ապօրինի գործողությունների մասին: Ըստ որում՝ արքայադստեր մեղքի անմիջական ապացույցներ չկան: Այնուամենայնիվ, դատախազը նշել է, որ Քրիստինային համարում է ամուսնու ապօրինի գործերից գոյացած շահույթի ստացող, ուստի թագավորի քույրը պետք է վճարի տուգանք, ինչն էլ արվել է, հաղորդել է ՏԱՍՍ-ը: