Կառավարությունն ԱԺ է ներկայացրել ԸՕ-ի լրամշակված տարբերակը. կան փոփոխություններ և նորամուծություններ
ՔաղաքականՀայաստանի Հանրապետության կառավարությունն Ազգային ժողով է ներկայացրել ընտրական օրենսգրքի նախագծի լրամշակված տարբերակը:
Ընտրական օրենսգրքի նախագծում կատարվել են որոշակի փոփոխություններ, որոնք հիմնված են նաև քաղաքացիական հասարակության և ընդդիմության ներկայացուցիչների որոշ առաջարկների վրա: Մասնավորապես, փոփոխություններ են կատարվել զանգվածային լրատվամիջոցների և դիտորդների իրավունքների վերաբերյալ հոդվածներում: Եթե ընտրական օրենսգրքի նախագծի նախնական տարբերակում սահմանված էր, որ մի տեղամասում չեն կարող գտնվել 8-ից ավելի զանգվածային լրատվության միջոցի ներկայացուցիչ և դիտորդ, ապա Ազգային ժողով ներկայացված տարբերակում լրագրողների թվի սահմանափակումը հանվել է ու սահմանվել է, որ յուրաքանչյուր լրատվական գործունեություն իրականցնող կարող է կենտրոնական ընտրական հանձնաժողովում հավատարմագրել ոչ ավելի, քան 50 ներկայացուցիչների:
ԶԼՄ ներկայացուցիչները քվեարկության օրը կարող են իրականացնել ընտրությունների և քվեարկության վերաբերյալ լուսաբանում կենտրոնական ընտրական հանձնաժողովում հավատարմագրվելուց հետո: Լրատվական գործունեություն իրականացնողը կարող է հավատարմագրել իր ներկայացուցիչներին, եթե առնվազն մեկ տարի իր անունից տարածում է լրատվություն: Զանգվածային լրատվության միջոցի ներկայացուցչի կողմից սույն օրենսգրքի պահանջները խախտելու դեպքում ընտրական հանձնաժողովի ներկա անդամների ձայների 2/3-ով ընդունված որոշմամբ տվյալ ներկայացուցիչը կարող է հեռացվել հանձ նաժողովի նիստից, իսկ քվեարկության օրը տեղամասային կենտրոնից: Օրենսգրքի նախագծում նաև հստակ սահմանված է, որ դիտորդի, զանգվածային լրատվության միջոցի ներկայացուցչի, այցելուի իրավունքների որևէ սահմանափակում չի թույլատրվում: Ոչ ոք (այդ թվում' ընտրական հանձնաժողովները) իրավունք չունեն դիտորդին, զանգվածային լրատվության միջոցի ներկայացուցչին, այցելուին դուրս հանելու տեղամասային կենտրոնից կամ ցանկացած այլ կերպ նրանց մեկուսացնելու հանձնաժողովի աշխատանքներին ներկա լինելուց՝ բացառությամբ նրանց կողմից սույն օրենսգրքի պահանջները խախտելու դեպքերի: Եթե քվեարկության սենյակում գտնվող դիտորդների, զանգվածային լրատվության միջոցների ներկայացուցիչների թիվն այնպիսին է, որ ակնհայտորեն խաթարում է քվեարկության բնականոն ընթացքը, ապա տեղամասային ընտրական հանձնաժողովը իրավասու է ներկա անդամների ձայների 2/3-ով ընդունված որոշմամբ սահմանափակել քվեարկության սենյակում միաժամանակյա գտնվելու իրավունք ունեցող դիտորդների և ԶԼՄ ներկայացուցիչների ընդհանուր թիվը: Ընդ որում, այդ թիվը չի կարող նվազ լինել 15-ից:
Ընտրական օրենսգրքի նախագծում նորամուծություն է մատնահետքով ընտրողների գրանցման գործընթացը: Նախագծում սահմանված է՝ եթե ընտրողը գրանցված է տվյալ տեղամասի ընտրողների ցուցակում, ապա նրա ներկայացրած անձը հաստատող փաստաթղթի տվյալներն էլեկտրոնային համակարգ ներմուծելուց հետո էկրանի վրա վառվում է կանաչ լույսը: Այն դեպքում, երբ էկրանին վառվում է կանաչ գույնի ազդանշան, ընտրողը կենտրոնական ընտրական հանձնաժողովի սահմանած կարգով պետք է ներմուծի իր մատնահետքը, որից հետո տեխնիկական սարքավորումը տպում է ընտրողի ազգանունը, անունը, ընտրողների ց ուցակում հերթական համարը, անձը հաստատող փաստաթղթի համարը, քվեարկության կտրոնի հերթական համարը, իսկ թվային շտեմարանում առկա լինելու դեպքում' նաև ընտրողի լուսանկարը պարունակող քվեարկության կտրոն:
Ընտրական օրենսգրքի նախագծի լրամշակված տարբերակում սահմանված է նաև, որ քվեարկության մասնակցության վերաբերյալ տեղեկություններ պարունակող ընտրողների ցուցակները (այդ թվում' էլեկտրոնային ցուցակները) հրապարակման ենթակա չեն, արգելվում է դրանցից լուսապատճեններ հանել, դրանք լուսանկարել կամ տեսանկարահանել:
Հայաստանի Հանրապետության նոր ընտրական օրենսգրքի նախագծի հիմնական նպատակն է լուծում տալ այն հարցերին, որոնք ծագելու են համապետական ընտրությունների նախապատրաստման, կազմակերպման, անցկացման և ամփոփման փուլերում: Միևնույն ժամանակ նախագծում հաշվի են առնվել համապետական ընտրությունների վերաբերյալ դիտորդական առաքելություն իրականացրած ԵԱՀԿ/ԺՀՄԻԳ-ի վերջնական զեկույցներում ներկայացված առաջարկությունները, հանձնարարականները, ինչպես նաև համապետական ընտրությունների արդյունքներով Հայաստանի Հանրապետության սահմանադրական դատարանի որոշում ներով արտահայտված իրավական դիրքորոշումները' ուղղված ընտրական օրենսգրքի բարելավմանը, ինչպես նաև համապետական ընտրությունների վերաբերյալ ԿԸՀ հաղորդագրությամբ ներկայացված առաջարկությունները: Ներկայացված նախագծում իրացվել են նաև ընտրությունների ժամանակ դիտորդական առաքելություն իրականացրած տեղական հասարակական կազմակերպությունների մի շարք առաջարկություններ: