Պարտաճանաչ կոճակ սեղմողը. Արմեն Ավետիսյան
ՎերլուծականԱրդյոք ովքե՞ր են…
Պատգամավորներ են, ովքեր նստած ԱԺ փափուկ աթոռներին, երևի թե, հանուն ազգիս բարօրության կամ ի շահ իրենց օրենքներ են ընդունում, մերժում, ասում, խոսում, քննարկում ու քննարկվում…
Արդեն 4 տարի է՝ 131 պատգամավոր ապրում է մեր վճարած հարկերի շնորհիվ, ու երևի թե սրտատրոփ սպասում 2017-ին՝ մեկ էլ տեսար վերընտրվեց, մեկ էլ տեսար…
Քանի որ հաշված ամսիներ են մնացել մինչ ԱԺ ընտրությունները, մենք շարունակում ենք վերհիշել նրանց գործունեությունը՝ պատգամավոր առ պատգամավոր ներկայացնելով նրանց անցած ուղին:
Lurer.com-ի դիտակետում հայտնված հաջորդ պատգամավորը ԱԺ ԲՀԿ խմբակցության պատգամավոր Արմեն Ավետիսյանն է:
……………
Ծնվել է 1971թ. սեպտեմբերի 22-ին Մեդովկա գյուղում (Լոռու մարզ):
1988թ. ընդունվել է Օդեսայի գյուղատնտեսական ինստիտուտը, այնուհետեւ 1990թ. տեղափոխվել եւ 1993թ. ավարտել է Երեւանի անասնաբուծական-անասնաբուժական ինստիտուտի անասնաբուծության ֆակուլտետը: Անասնաբույծ-ճարտարագետ:
1993-1995թթ. աշխատել է «Նարեկ» գյուղատնտեսական կոլեկտիվ տնտեսությունում գլխավոր անասնաբույժ: 1997-2012թթ. եղել է Մեդովկա համայնքի գյուղապետի տեղակալ:
2012թ. մայիսի 6-ին Ազգային ժողովի պատգամավոր է ընտրվել համամասնական ընտրակարգով «Բարգավաճ Հայաստան» կուսակցությունից:
……
Ուզում եմ գրել այս պատգամավորի մասին, բայց անկեղծ՝ գրելու բան չկա…
Հերթական պատգամավորը, որ մեր վճարած հարկերի հաշվին աշխատավարձ է ստանում՝ ոչնչի համար:
Parliamentmonitoring.am կայքի տվյալներով՝ մինչ օրս պատգամավորը տվել է 0 հարց, ունեցել՝ 0 ելույթ: Բայց, փոխարենը, պարտաճանաչ ներկայացել է ԱԺ գրեթե բոլոր նիստերին: Նա ունի ընդամենը բացակա:
Ապրի՛ Արմեն Ավետիսյանը:
Նա նաև պարտաճանաչ սեղմել է այս ու այն օրենքներն ընդունելու կամ մերժելու համար նախատեսված կոճակն, ու քանի որ բարի մարդ է՝ գրեթե միշտ «բարի կամք» է դրսևորել՝ կողմ քվերակել 512 անգամ, իսկ դեմ՝ 75 անգամ:
Նրա բարի դեմքին նայելիս, ենթադրում եմ և ավելի քան համոզված եմ, որ ձեռքի հետ նաև կողմ քվերակած կլինի նաև բացակա ընկերների փոխարեն, չէ որ նրանք շատ են…
Վերջ… էլ ասելիք չկա:
Թերևս միայն ավելացնեմ, որ պատգամավոր Արմեն Ավետիսյանի անունը զետեղված է պարտադիր զինվորական ծառայությունից խուսափած պաշտոնյաների անվան ցանկում:
Անի Սահակյան