Իրանը չի հայտարարում, սակայն շատ լավ գիտակցում է՝ տարածաշրջանում ով է իր բարեկամը և ով՝ թշնամին. իրանագետ
ՀարցազրույցներԻնչպես փոխանցում է parstoday.com-ի հայկական ծառայությունը, վկայակոչելով ԻՌՆԱ լրատվական գործակալությանը, ԻԻՀ-ն Ադրբեջանին ու Հայաստանին ինքնազսպվածության ու երկխոսության կոչ է արել: Մասնավորապես, ԻԻՀ ԱԳ նախարարության խոսնակ Բահրամ Ղասեմին կիրակի գիշերը, հղում կատարելով Ադրբեջանի ու Հայաստանի միջև ռազմական բախումների սրման նոր շրջանի մասին վկայող հրապարակումներին, նշել է. «ԻԻՀ-ն իր հյուսիսային երկու հարևաններին ինքնազսպվածության կոչ է անում և կողմերին հորդորում է անդորրի վերականգնման և տարաձայնությունները բանակցության ու երկխոսության միջոցով խաղաղ պայմաններում կարգավորելու ուղղությամբ ջանք գործադրել: ԼՂ-ի հակամարտության կարգավորման պատասխանատվությունն ստանձնած միջազգային կառույցները պետք է իրագործեն հակամարտությանը վերջ տալու ուղղությամբ իրենց պարտավորությունները»,-հայտարարել է ԻԻՀ ԱԳ նախարարության խոսնակը՝ նշելով, որ ԻԻՀ-ն պատրաստ է օժանդակել կողմերին՝ տարածաշրջանում անդորրի ու անվտանգության վերահաստատման ուղղությամբ:
ԼՈւՐԵՐ.com-ի թղթակիցի հետ զրույցում, խոսելով արցախյան հակամարտության վերաբերյալ Իրանի դիրքորոշման մասին, իրանագետ Վարդան Ոսկանյանը կարծիք հայտնեց, որ ակնհայտ է՝ Իրանը որդեգրել է հավասարակշիռ մոտեցում, սակայն շատ լավ տեղյակ է, թե ով է սովորաբար գնում սադրանքների. «Միանշանակ է այն, որ սադրանքների հեղինակը ադրբեջանական հանրապետությունն է: Իրանի արտգործնախարարության խոսնակի կողմից ավելի հաճելի կլիներ ակնկալել հասցեական մոտեցում: Եթե հաշվի առնենք այն, որ իրանական կողմը իր ենթատեքստում հասկանում է սադրիչ կողմի գործողությունների անհարմարավետությունը, ապա կոչը ուղղված է հենց Ադրբեջանին, որը ոչ միայն պարբերաբար խախտում է հրադադարի ռեժիմը, այլև գնում է լայնամասշտաբ սադրանքների»:
Ըստ իրանագետի՝ Իրանին ձեռնտու չէ, որ իր սահմանների միջակայքում լարվածություն լինի, որը հրահրում է ադրբեջանական հանրապետությունը: Հետևաբար, Ադրբեջանն այն պետությունն է, որը լուրջ վտանգ է ներկայացնում ոչ միայն արցախյան, այլև իրանական անվտանգության տեսանկյունից: Հատկապես, հաշվի առնելով այն հանգամանքը, որ սահմանից, Արաքսից անմիջապես այն կողմ կան տարածքներ, որոնց նկատմամբ Ադրբեջանն ունի ակնհայտ հավակնություններ: Ադրբեջանի Հանրապետության գործողությունները դիտարկելու դեպքում բարդ է որոշել՝ հակաիրանական գործողություննե՞րն են մեծաթիվ, թե՞ հակահայկական:
Վարդան Ոսկանյանի խոսքով՝ թեև Իրանը չի հայտարարում, սակայն շատ լավ գիտակցում է՝ տարածաշրջանում ով է իր բարեկամը և ով՝ թշնամին:
Հարցին՝ կարելի՞ է ենթադրել, որ Իրանը Հայաստանի շահերը կպաշտպանի, իրանագետը պատասխանեց.
«Անշո՛ւշտ: Հռետորաբանության մակարդակում՝ իրանցիները, իհարկե, կշարունակեն պահպանել «համահավասարեցումը, սակայն շատ լավ գիտակցում են՝ Հարավային Կովկասում որ պետությունն է, որ ունի հակաիրանական դիրքորոշում»,- խոսքը եզրափակեց նա:
Սոնա Հարությունյան