Մի՛ սղոցեք հեռուստադիտողի ականջը «դիսպետչեր», «բրենդ» և այլ օտարալեզու բառերով. լեզվաբան
Հասարակություն«Լրատվության դաշտն այսօր շատ լայն է և տեղեկատվական լրատվամիջոցները բազմազան են: Լեզվի անաղարտության առումով՝ լրատվական ծրագրերը, ռադիո-հեռուստա ծրագրերը լեզվի հետ կապված խնդիրներ չունեն և մայրենիի պահպանության մասին իսկապես հոգ են տանում»,-այսօր լրագրողների հետ զրույցում ասաց լեզվաբան Լավրենտի Միրզոյանը:
«Լրատվամիջոցները որքան էլ ջանան սխալներ թույլ չտալ, հնարավոր չէ, որովհետև դաշտում առկա է պրոֆեսիոնալ լրագրողների պակաս և սրան ավելանում է նաև այն արագ տեմպը, որում ստիպված են աշխատել լրագրողները: Պետական մոտեցում է պետք այս հարցում: Կա օրենք, որով պետք է Կառավարությանն առնթեր լեզվի պետական տեսչություն գործի, որն էլ կվերահսկի մայրենի լեզվի անաղարտության պահպանումը: Տեսչությունը կա, այսօր սակայն, Կառավարությունը որոշում է կայացնում, որ այդ տեսչությունը պետք է լուծարվի»,-ասաց լեզվաբանը՝ հարց հնչեցնելով, որ եթե տեսչությունը լուծարվի, ո՞վ է վերահսկելւ մեր երկրի լեզվական քաղաքականությունը:
Լեզվաբանից հետաքրքրվեցինք ամենատարածված սխալների մասին: Լավրենտի Միրզոյանն, առանձնացնելով մի շարք տարածված սխալներ՝ խորհուրդ տվեց հեռուստադիտողի ականջը չսղոցել դիսպետչեր, բրենդ, լոգո և այլ օտարալեզու բառերով՝ շեշտելով, որ այստեղ մեծ անելիք ունեն լեզվաբանները և պետությունը:
Լավրենտի Միրզոյանը նաև առանձնացրեց ստեղծագործական միությունները՝ շեշտելով, որ նրանց անգործությունն է շատ պարագայում դառնում լեզվական սխալների և դրանց տարածման պատճառ: Հենց նույն լրագրողների միությունը պետք է, օրինակ, ասի, որ ԶԼՄ հապավում գոյություն չունի, պետք է կիրառել Տեղեկատվական լրատվության միջոց տարբերակը,-ասաց նա: