NASA-ի «Մոլորակների որսորդն» առաջին լուսանկարն է արել ուղեծրից (տեսանյութ)
ՏեսանյութերNASA ամերիկյան տիեզերական գործակալության կայքը հաղորդում է, որ TESS նոր տիեզերական աստղադիտակը, որի նպատակը կյանքի համար պոտենցիալ հարմար մոլորակներ գտնելն է, դուրս է բերվել աշխատանքային ուղեծիր եւ արել է առաջին լուսանկարը։ Ցենտավրա համաստեղության լուսանկարում, ինչպես նշվում է, ավելի քան 200 հազար աստղ է պատկերված: Մայիսի 30-ին TESS-ը կուրսի ուղղում կանի՝ ուղեծիր դուրս գալու համար, որը սարքին թույլ կտա իր տեսախցիկներով դիտարկվող երկնքի առավելագույն տարածություն ընդգրկել։
Ակնկալվում է, որ աստղադիտակը գիտական լուսանկարահանումները կսկսի հունիսի կեսերին՝ ուղեծիր դուրս գալուց եւ տեսախցիկների կալիբրացումից հետո: Հիշեցնենք, որ TESS-ը տիեզերք էր բաց թողնվել ապրիլի 19-ին SpaceX հրթիռով: TESS տեսախցիկի խնդիրը 200 000 աստղերի ուսումնասիրությունն է՝ դրանց շուրջ մոլորակներ հայտնաբերելու նպատակով, այդ թվում նաեւ՝ երկրային տիպի: