Ակտիվ ու հետաքրքրասեր փոքրիկից` կրթության նախարար. ԿԳՆ-ում նշեցին երեխաների պաշտպանության օրը
ՀասարակությունՀՀ կրթության և գիտության նախարարությունում ամենուր մանուկների խինդ ու ծիծաղ էր. գերատեսչության աշխատակիցների երեխաներն այցելել էին իրենց ծնողների աշխատավայր:
Հունիսի 1-ին` Երեխաների պաշտպանության միջազգային օրը, ՀՀ ԿԳ նախարար Արայիկ Հարությունյանը կազմակերպելով նմանատիպ միջոցառում, փորձել էր երեխաներին ներգրավել իրենց ծնողների աշխատանքային առօրյային:
Նախարարի մանկությունը
Չարաճճի երեխա չեմ եղել, ավելի շատ ակտիվ էի ու հետաքրքրասեր: Փոքրուց էլ ավելի շատ սիրել եմ մեծերի հետ շփվել, ինչն ինձ թույլ է տվել ավելի շատ հմտություններ և գիտելիքներ ստանալ: Մանուկ հասակում շատ տարբեր դրվագներ են եղել դպրոցիս, ընտանիքիս հետ կապված: Այս պահին որևէ առանձնահատուկ պահ չէի ցանկանա նշել:
Արայիկ Հարությունյանի մաղթանքը երեխաներին
Երեխաներին մաղթում եմ երջանիկ ներկա, երջանիկ ապագա և կարծում եմ, որ վերջին շաբաթների ընթացքում տեղի ունեցած փոփոխությունները ստեղծել են բոլոր նախադրյալներն այդ ամենի համար: Մենք հիմա ավելի շատ ժպիտներ ենք տեսնում և պետք է պահպանենք դա: Վստահ եմ, որ մեր երեխաները պետք է ապրեն Հայաստան հարմարավետ երկրում, որտեղ իրենց պահանջները կիրականան:
Փոքրիկ Նատալիի մեծ տոնը
Իմ մաման այստեղ փոխնախարար է աշխատում: Արդեն երեք անգամ եկել եմ իր աշխատավայր: Ես արդեն դպրոց եմ գնում, սիրում եմ դպրոցն ու ամենաշատը մաթեմատիկա: Գերազանցիկ եմ: Ես այսօր շատ ուրախ օր եմ անցկացնելու` պապաս գալու է ու ինձ տանի հետաքրքիր միջոցառման, որ երեխաների համար կազմակերպել են:
8-ամյա Նադյայի հունիսի 1-ը
Ես 8 տարեկան Սեդոյան Նադյան եմ: Շատ եմ սիրում հունիսի 1-ը: Այդ օրը միշտ շատ ուրախ է անցնում` կարուսելներ եմ նստում, ինչ ուզում եմ անում եմ, բայց չարաճճիություններ չեմ անում: Տատիկս է աշխատում այս նախարարությունում, բայց մասնագիտությունը չգիտեմ: