Թիվ 16 պոլիկլինիկայի աշխատակիցների մտահոգությունը փարատվում է
ՀասարակությունԵրևանի ավագանու ԵԼՔ խմբակցության անդամ Թեհմինա Վարդանյանն անդրադարձել է Երևանի Քանաքեռ-Զեյթուն վարչական շրջանի թիվ 16 պոլիկլինիկայում տիրող իրավիճակին:
Նա նշում է՝ այսօր խոսել է պոլիկլինիկայում բողոքի ակցիա իրականացնող աշխատակիցների հետ ներկայիս իրավիճակի հետ կապված և արձանագրում, որ փարատվում է վերջիններիս մտահոգությունը:
«Տնօրենի ժամանակավոր պաշտոնակատար Նունե Խաչատրյանը հավաստիացրել է, որ իր և իր ընտանիքի որոշմամբ, չի առաջադրվելու տնօրենի պաշտոնում և չի մասնակցի այդ ընտրության մրցույթին: Այսպիսով, փարատվում են աշխատակիցների մտահոգությունները այդ մասով, ինչը նաև դաշտ է ստեղծում առաջադրել իրենց վստահությունը և հարգանքը վայելող թեկնածուին՝ Լենա Հովսեփյանին»,- նշում է Վարդանյանը:
Նրա խոսքով՝ ԵԼՔ խմբակցության ավագանու անդամները հետևողական են լինելու, որ տնօրենի թափուր հաստիքի մրցույթն անցկացվի բացարձակ թափանցիկ և արդար պայմաններում:
«Բուժանձնակազմը մտահոգություն է հայտնում նաև, որ քաղաքապետարանի կողմից մրցույթին կառաջադրվի նույն պոլիկլինիկայում աշխատող մանկաբարձ-գինեկոլոգ Արփինե Սողոյանը, ով, աշխատակիցների պնդմամբ, կխորացնի պոլիկլինիկայում գործող ճգնաժամը»,- ասում է նա՝ ընդգծելով, որ աշխատակիցներն իրեն տեղեկացրել են նաև, որ Սողոյանի առաջադրվելու պարագայում պատրաստվում են ավելի լայնամասշտաբ բողոքի ակցիաներ իրականացնել նաև քաղաքապետարանի դիմաց:
Նշենք, որ վերջին շրջանում պոլիկլինիկայի աշխատակիցները գործադուլներ են անում՝ արտահայտելով իրենց բողոքը։ Բանն այն է, որ թիվ 16 պոլիկլինիկայի բուժաշխատողները բողոքում էին պոլիկլինիկայի տնօրենի կողմից իրականացվող ապօրինությունների վերաբերյալ, որին հաջորդեց Երևանի ավագանու ԵԼՔ խմբակցության այցը պոլիկլինիկա․ օրեր անց տնօրեն Մարինա Ստեփանյանն ազատվեց աշխատանքից։
Երևանի ավագանու ԵԼՔ խմբակցության անդամ Դավիթ Խաժակյանն էլ, օրերս անդրադառնալով խնդրին, նշել էր, որ պոլիկլինիկայի աշխատակիցների կողմից տնօրենի հեռացումից հետո ներկայացվել է ստորագրահավաք, որով առաջարկում են տնօրենի ժանմանակավոր պաշտոնակատար նշանակել փոխտնօրենին, ով կոլեկտիվի կողմից ընդունված է, սակայն փոխարենը՝ քաղաքապետարանը ժամանակավոր պաշտոնակատար է առաջարկում նշանակել սոնոգրաֆիայի բժշկին, ով, ըստ անձնակազմի, եթե նշանակվի՝ կլինի նախկինի նման։