Երկու ուղղաթիռ ենք գնելու. Առողջապահության նախարար
ՀասարակությունԱյսօր ԱԺ-ում 2017 թ. բյուջեի կատարողականի քննարկման ժամանակ Առողջապահության նախարար Արսեն Թորոսյանին հարց ուղղեց ԱԺ ՀՅԴ խմբակցության քարտուղար Արմենուհի Կյուրեղյանը: Վերջինս նշեց՝ մարզերում պետական բժշկական հաստատությունները չունեն համապատասխան նյութատեխնիկական բազա և ուղղորդում են հիվանդներին մայրաքաղաք` նվազեցնելով տեղերում բուժհաստատությունների դերը:
«Դեղագործական ապրանքների համար ծախսվել է 3 մլրդ 500 մլն դրամ, իսկ բժշկական սարքեր ձեռք բերելու համար՝ ընդամենը 10 մլն: Արդյո՞ք սա չի հուշում, որ մարզերում բուժսարքավորումերի կարիք չկա, բոլորն ապահովված են բարձր որակի սարքավորումներով, թե՞ ուղղակի ուղղորդում ենք բնակչությանը դեպի մասնավոր սեկտոր»,- հարց ուղղեց Կյուրեղյանը՝ նախարարության բյուջեի ծախսերից բերելով այս երկու տվյալը:
Նախարար Արսեն Թորոսյանն էլ պատասխանեց, որ 10 մլն-ը վերաբերում է նախարարության ուղղակի գնումներին և Առողջապահության նախարարությունն իր պետական բյուջետային միջոցներից վերջին տարիներին սարքավորումներ գրեթե ձեռք չի բերել և որ այդ սարքավորումները ձեռք են բերվել այլ միջոցերով:
«Մարզային հիվանդանոցների մասով մենք շուտով գրեթե ոչ մի չվերանորոգված կլինիկա չենք ունենա, շենքային պրոբլեմով մարզային հիվանդանոց չենք ունենալու: Թեև Հայաստանը սարքավորումների առումով աշխարհի շատ զարգացած երկրների չի զիջում, սակայն կան սարքեր, որ ընդհանրապես չունենք: Մարզերից ուղղորդումները ոչ թե սարքավորումների պատճառով են, այլ՝ մասնագետների բացակայության: Մենք մարզերը լավ կադրերով հագեցնելու պրոբլեմ ունենք: Մենք միշտ պետք է բալանսավորենք ծախսերը և ելնելով արդյունավետությունից, չենք կարող ցանկացած մարզում ունենալ ամեն հնարավորությամբ հիվանդանոց»,- ասաց նա՝ ընդգծելով, որ դա ձեռնտու չէ նաև պետությանը և տեղի աշխատողներին, որովհետև ծանրաբեռնված հիվանդանոցը աշխատանքի առումով կտուժի և որակ չի լինի:
«Աշխարհում այսպիսի պրակտիկա գոյություն ունի, որ անհասանելի վայրերում ոչ թե հիվանդանոցներ են սարքում, որ մարդիկ օգտվեն, այլ ուղղաթիռ են գնում: Ես այդ հարցը բարձրացնելու եմ: Մենք մեկի տեղը երկու ուղղաթիռ ենք գնելու: Այս հարցը քննարկել ենք ԱԻ նախարարի հետ, փորձելու ենք լուծում տալ հարցին»,- նշեց Թորոսյանը: