«Նորֆոլկ Քոնսալթինգ»-ի տնօրենին կազատեն
ԻրավունքՕրերս Ազգային անվտանգության ծառայության միջնորդությամբ կալանավորվել էին «Նորֆոլկ Քոնսալթինգ» ընկերության գլխավոր տնօրեն՝ 51-ամյա Արմեն Ունանյանը, ընկերության գլխավոր հաշվապահ՝ 32-ամյա Տիգրան Զոհրաբյանը և ընկերության հաշվապահական ծառայության ղեկավար՝ 27-ամյա Սիմոն Առաքելյանը:
Ունանյանի նկատմամբ մեղադրանքն առաջադրվել էր ՀՀ Քրեական օրենսգրքի 205-րդ հոդվածի 2-րդ մասի հատկանիշներով՝ «Հարկերը, տուրքերը կամ պարտադիր այլ վճարումները վճարելուց չարամտորեն խուսափելը, օրենսդրությամբ նախատեսված հաշվետվություններ, հաշվարկներ, հայտարարագրեր կամ հարկման հիմք հանդիսացող պարտադիր այլ փաստաթղթեր չներկայացնելու կամ նշված փաստաթղթերի մեջ ակնհայտ խեղաթյուրված տվյալներ մտցնելու միջոցով, որը կատարվել է առանձնապես խոշոր չափերով»։
Հետաքրքրական է, որ այս գործի հետ կապված հիմնականում միակողմանի տեղեկություն է տարածվում:
ԼՈւՐԵՐ.com-ի հարցերին խուսափեց պատասխանել անգամ Ունանյանի փաստաբան Սամվել Անդրիասյանը, ով հարցերը լսելուն պես՝ տվեց մեկ պատասխան. «Այդ գործի հետ կապված ոչինչ չեմ ուզում ասել»:
Մեր տեղեկություններով՝ հունիսի 15-ին, Երևան քաղաքի Ընդհանուր իրավասության դատարանի Շենգավիթի նստավայրում դատավոր Դավիթ Բալայանը կքննի Ունանյանի փաստաբանի՝ գրավի դիմաց միջնորդությունը:
Դատական որոշումները որքան էլ գաղտնի են մինչ հրապարակումը, բայց արդեն իսկ շրջանառվում են խոսակցություններ, որ Ունանյանի՝ գրավի դիմաց ազատ արձակումը հնարավոր է:
Քաղաքական համատեքստում ընկալումների ֆոնին կարող ենք արձանագրել, որ դատարանի նման որոշումը կստվերի և կհեղինակազրկի ԱԱԾ-ի գործողությունները: Մնում է հուսալ, որ նոր իշխանությունները բավականին ուշիմ կգտնվեն և թույլ չեն տա նման որոշման կայացում:
Հիշեցնենք, որ ԱԱԾ-ն հանցավոր սխեմա էր հայտնաբերել. մասնավորապես, «Նորֆոլկ Քոնսալթինգ» ՍՊ ընկերության ներկայացուցիչները Թուրքիայից, Չինաստանից և Արաբական Միացյալ Էմիրություններից բեռնատարներով ներմուծված ապրանքները հաճախ ճիշտ տեսականիով և անունով չեն հայտարարագրել ու մաքսազերծել, ինչով նվազեցրել են պետությանը վճարման ենթակա գումարները, բացի այդ, անհավասար մրցակցային պայմաններ են ստեղծել այն քաղաքացիների համար, ովքեր նույնանուն ապրանքները ներմուծել են ոչ իրենց ընկերության միջոցով։
ԱԱԾ հաղորդագրությունը կարդացեք այստեղ:
Հիշեցնենք, որ դեռևս օրեր առաջ այս ընկերության գործունեությունից տուժող առևտրականներ էին ԼՈւՐԵՐ.com-ին դիմել և ներկայացրել իրենց դժգոհությունները: Մեր հրապարակումներին հաջորդեցին ԱԱԾ-ի գործողությունները, սակայն մենք նշել էինք նաև, որ այս ընկերության հետևում կանգնած է նախկին ՊԵԿ նախագահ Վարդան Հարությունյանը, ում, ԱԱԾ-ն, կարծես թե շրջանցել է: