Հեղափոխությունը հասավ ԱԺ. ՀՀԿ-ն հարմարվելու է ընդդիմության դերին
ՎերլուծականԱյն բանից հետո, երբ ՀՀԿ օլիգարխիկ թևը ևս հեռացավ խորհրդարանական խմբակցությունից, ՀՀԿ-ն «հատել» է մեծամասնության համար անհրաժեշտ պատգամավորների թվի ներքին շեմը՝ 55 պատգամավոր։ Սա նշանակում է, որ Սահմանադրության համաձայն հանրապետականը պետք է զիջի նաև ԱԺ նախագահի և ԱԺ նախագահի երկու տեղակալների պաշտոնները, բացի այդ փոփոխության կենթարկվի նաև խորհրդարանական հանձնաժողովների ղեկավար կազմը: Ըստ Սահմանադրության՝ արդեն ընդդիմության ճամբարը համալրած ՀՀԿ-ն ԱԺ ղեկավարությունում կարող է ունենալ միայն մեկ փոխնախագահի պաշտոն:
Այսինքն՝ լավագույն դեպքում պետք է մնա կամ Էդուարդ Շարմազանովը, կամ Արփինե Հովհաննիսյանը։ Դա իհարկե լավագույն դեպքում, ամենայն հավանականությամբ նոր իշխանությունները նման հումանիզմ չեն դրսևորի և արդյունքում խորհրդարանում մենք կունենանք հետևյալ կոնֆիգուրացիան՝ Ազգային ժողովի նախագահը կլինի «Ելք»-ից, փոխնախագահները՝ ԲՀԿ-ից, ՀՅԴ-ից ու ևս մեկը՝ կրկին «Ելք-ից։ Գլխավոր ինտրիգը այստեղ կայանում է նրանում ՝ արդյո՞ք «Ծառուկյան» դաշինքը կպայքարի օրենսդիրի նախագահի պաշտոնի համար, թե ամեն դեպքում ձեռք կբերվի համաձայնություն Նիկոլ Փաշինյանի հետ: Մի կողմից հասկանալի է, որ առանց ԲՀԿ-ի վերոնշյալ պաշտոնների ընտրության հարցում գործը գլուխ բերել չի լինի, մյուս կողմից գիտակցելով ԲՀԿ ախորժակը և հնարավորությունները՝ Փաշինյանը դժվար թե նրանց զիջի ԱԺ ղեկավարությունը: Այս դեպքում հարց է առաջանում ո՞վ «Ելք»-ից կզբաղեցնի Արա Բաբլոյանի տեղը:
Եթե այս անգամ էլ Փաշինյանը անտեսի Էդմոն Մարուքյանին և վերջինիս թողնի շարքային պատգամավորի կարգավիճակում, դա արդեն լուրջ մեսիջ պետք է լինի, որ նախկինում արվածը, ասվածը և հատկապես գրվածը՝ չի ներվել: Մարուքյանի փոխարեն Փաշինյանը կարող է առաջարկել Արամ Սարգսյանի թեկնածությունը, ով հաշվի առնելով իր ազգակցական կապերը թերևս ընդունելի կերպար է խորհրդարանում ներկայացված բոլոր ուժերի համար:
Ստելլա Խաչատրյան