Հայաստանում առաջին անգամ կանցկացվի ռաֆթինգի առաջնություն
ՍպորտՀայաստանում օգոստոսի 11-ին առաջին անգամ կանցկացվի ռաֆթինգի առաջնություն: Կազմակերպիչները որպես առաջնության վայր ընտրել են Դեբեդ գետը:
rafting.am սպորտային ակումբի հիմնադիր, Հայաստանի երիտասարդ կանանց ասոցիացիայի նախագահ Լիլիթ Ասատրյանը այսօր լրագրողների հետ հանդիպմանը նշեց, որ առաջնության նպատակն է նպաստել ռաֆթինգ մարզաձևի զարգացմանը, ինչպես նաև այն հանրայնացնել որպես ազատ ժամանցի ձև ու որպես զբոսաշրջային արտադրանք:
«Սա պրոֆեսիոնալ առաջնություն չէ, այլ սիրողական: Մասնակցելու են տարբեր կառույցներ, ոլորտներ ներկայացնող անձանցից կազմված խմբեր: Կլինեն ներկայացուցիչներ պետական հիմնարկներից, միջազգային, մասնավոր, բանկային և այլ կազմակերպություններից»,-ասաց Լիլիթ Ասատրյանը: Առաջնությունից ստացված հասույթն ուղղվելու է սահմանափակ կարողություններ ունեցող երեխաներին այս մարզաձևում ներառելու գործին:
Առաջնության ընթացքում հաղթող թիմը կպարգևատրվի պատվոգրով և գավաթով: Հայաստանի ռաֆթինգի ֆեդերացիայի փոխնախագահ Մակար Սարգսյանը նշեց, որ մասնակիցներին ուղղորդելու են հրահանգիչները. Մրցույթն անվտանգ կլինի:
«Շատ հետաքրքիր մրցաշար է սպասվում, լինելու են մասնակիցներ Վրաստանից: Առաջնությունը կուղեկցվի պրոֆեսիոնալների կողմից, կպահպանվեն անվտանգության բոլոր նորմերը: Մենք համագործակցում ենք թե ՀՀ սպորտի և երիտասարդության, թե ՀՀ արտակարգ իրավիճակների նախարարությունների հետ, որպեսզի ոլորտը լինի կարգավորված»,-ասաց Մակար Սարգսյանը:
2018թ. հունիսի 26-ից ի վեր, ՄԱԿ-ի զարգացման ծրագրի «Ինտեգրված գյուղական զբոսաշրջության զարգացում» ծրագրի աջակցությամբ հիմնադրվել և ամենօրյա ռեժիմով գործում է rafting.am Հայաստանի առաջին ռաֆթինգ մարզական ակումբը: Մասնագետները նշեցին, որ այս մեկ ու կես ամսվա ընթացքում ռաֆթինգի նկատմամբ բավական մեծ հետաքրքրություն են գրանցել: Առայժմ հիմնական այցելուները հայաստանցիներ են:
rafting.am մարզական ակումբը, Հայաստանի ռաֆթինգի ֆեդերացիան նախատեսում են Հայաստանում անցկացնել նաև ռաֆթինգի պրոֆեսիոնալ առաջնություն: