Մշակույթի նախարարությունը չի կարող որևէ փոփոխություն առանց հանրությանը տեղեկացնելու հաստատել․ Մշակույթի փոխնախարար
ԲլոգոսֆերաՀայաստանի ազգային պատկերասրահի և պատմության թանգարանի մուտքին արձաններ տեղադրելու թույլտվության մասին սոցցանցերում անհիմն աղմուկ է բարձրացվել: Այս մասին ֆեյսբուքյան իր էջում գրել է ՀՀ մշակույթի փոխնախարար Տիգրան Գալստյանը։
Գրառման մեջ մասնավորապես ասվում է․
«Մշակույթի նախարարության գիտամեթոդական խորհուրդը քննարկել է թանգարանի մուտքի աջ և ձախ կամարների տակ Տրդատ 3-րդի և Գրիգոր Լուսավորչի արձանների նախագիծը (Մարկ Գրիգորյանի և Ա. Ղազարյանի էսքիզային նախագծով այդ հատվածում նախատեսվում էր արձաններ, որոնց պատվանդանները կառուցվել են, բայց արձանները այդպես էլ չեն տեղադրվել): Գիտամեթոդական խորհուրդը քննարկման ընթացքում դիտողություններ է ներկայացրել արձանի մասշտաբի, պատվանդանի նկատմամաբ դիրքի, արձանի նյութի վերաբերյալ և առաջարկել է նախագիծը նախ քննարկել գեղարվեստական խորհրդում, հանրային քննարկման ներկայացնել, քննարկել այդ վայրում Տրդատ 3-րդի և Գրիգոր Լուսավորչի արձաններ տեղադրելու նպատակահարմարությունը և հավանության դեպքում նորից ներկայացնել մշակույթի նախարարության գիտամեթոդական խորհդի քննարկմանը:
Հաշվի առնելով Հանրապետության հրապարկի պատմական և ճարտարապետական արժեքը և մեր հասարակության կողմից կամայական փոփոխության հանդեպ զգայուն լինելը`մշակույթի նախարարությունը չի կարող որևէ փոփոխություն գաղտնի հաստատել առանց հանրությանը տեղեկացնելու և կարծիքը հաշվի առնելու»։