«Ռեֆորմիստները» թափառող շներին օգնությունը չեն ուշացնի
ՔաղաքականԵրևանի ավագանու ընտրություններին մասնակցող «Ռեֆորմիստներ» կուսակցության քաղաքապետի թենկնածու Արտակ Ավետյանը մայրաքաղաքի առաջնահերթ խնդիրներից է համարում՝ աղբահանությունը, տրանսպորտի խնդիրը, վերելակների վիճակը, որոնք առկա են ցանկացած վարչական շրջանում:
Քաղաքապետ ընտրվելու դեպքում Ավետյանը պատրաստվում է ամենահրատապ խնդիրներից մեկի՝ աղբահանության խնդիրը լուծել աղբահանությունը սպասարկող օպերատորներ ավելացնելով, քանի որ այդ դեպքում կլինի մրցակցություն:
«Ռեֆորմիստների» թեկնածուն կարծում է, որ Երևանը կարիք ունի որակյալ մասնագետների և մտահոգիչ է համարում, որ քաղաքաշինության հետ կապված մասնագետների պակաս կա: Խնդրի լուծման համար նա առաջարկում է ստեղծել հատուկ կրթօջախներ, որտեղ մարդիկ կկարողնանան մասնագիտական համապատասխան կրթություն ստանալ:
Կուսակցության ուշադրության կենտրոնում են նաև թափառող կենդանիները, որոնց խնդրի կարգավորումը Ավետյանը տեսնում է կացարանների թիվն ավելացնելով:
«Երևանի ծայրամասերում շատ ամայի վայրեր կան, որտեղ հնարավոր է կացարաններ ստեղծել: Կենդանիներին հատուկ խնամք կլինի: Բազմացման խնդիրը՝ ստերջացման ճանապարհով կլուծվի: Մեր քաղաքում կենդանիների սպանությունը համարում եմ անթույլատրելի»,-նշել է Ավետյանը՝ ավելացնելով, որ օգնելու են բոլոր նրանց, ովքեր թափառող կենդանիների կողքին են: