Մենք ունենք հստակ ընտրազանգված․ Վահան Բաբայան
Քաղաքական«Ռեֆորմիստներ» կուսակցության նախագահ Վահան Բաբայանի համոզմամբ` կուսակցությունների ստացած ձայները Երևանի ավագանու ընտրություններում կարտահայտեն նոր իրավիճակը Հայաստանում և հստակ կարձանագրեն, թե որ քաղաքական ուժն ինչպիսի աջակցություն ունի։ Միևնույն ժամանակ, Բաբայանը վստահ է, որ այս ընտրությունները կանցնեն արդար և թափանցիկ։ «Մենք ինքներս էլ նույնպես մասնակցում ենք այս ընտրւթյուններին և չենք տեսել որևէ խոչընդոտ, ինչը չկար նախկինում»,-ԼՈՒՐԵՐ.com-ի հետ զրույցում ասաց Վահան Բաբայանը։
«Ռեֆորմիստներ» կուսակցության նախագահն, ամփոփելով Երևանի ավագանու ընտրությունների նախընտրական քարոզարշավը, նշեց, որ գոհ է գործընթացից, և որ իրենց շանսերն այս ընտրություններում հաղթանակի հասնելու համար՝ շատ բարձր է գնահատում․ «Մենք միակ ուժն ենք այս ընտրություններում, որ առաջադրել ենք մի թեկնածու, որը երբևէ չի եղել քաղաքականության մեջ՝ ի դեմս Արտակ Ավետյանի: Մեր կուսակցության համամասնական ցուցակում չկան քաղաքական գործիչներ։ Այս նախընտրական քարոզարշավի ժամանակ մենք նաև փոքրիկ մոնիթորինգ ենք անցկացրել և հասկացել ենք, որ ունենք հստակ ընտրազանգված, որը շատ մեծ չէ, բայց հստակ է, և որը կընտրի մեզ նաև խորհրդարանական ընտրություններում»։
Վահան Բաբայանը վստահեցնում է, որ իրենց կուսակցության կողմից Երևանի քաղաքապետի թեկնածու առաջադրված Արտակ Ավետյանի ֆենոմենն այն էր, որ վերջինս կարողացավ ներկայանալ հասարակ քաղաքացու պատկերացումներին համահունչ և դրանով կարողացավ շարժել մտավորականների, արվեստագետների հետաքրքրությունը, որոնք երբևէ չեն հետաքրքրվել քաղաքականությամբ։ Բաբայանն իր կուսակցության շանսերը բարձր է գնահատում մեկ այլ պատճառով եւս․ «Մենք գտնում ենք, որ հրապարակում հավաքված մարդիկ նրանք են, ովքեր ունեն այդ հնարավորությունը, իսկ մեր ընտրողները, ցավոք, ունեն հնարավորություն միայն գնալ ընտրատեղամասեր և կատարել իրենց ընտրությունը։ Մենք անհամբեր սպասում ենք ընտրությունների արդյունքներին, որպեսզի տեսնենք, թե որքան ձայներ ենք հավաքել, քանի որ սա մեր առաջին ընտրություններն են, որպես կուսակցություն»։
Բաբայանն, անդրադառնալով քաղաքական մյուս ուժերին, ասաց, որ որևէ մեկին կիրենց հակառակորդ թիմ չի տեսնում, և որ բոլորն իրենց ընկերներն ու կոլեգաներն են․ «Մենք որևէ մեկի հետ հակառակորդ կարգավիճակում չկանք և չենք էլ լինի։ Բոլորին հաջողություն ենք մաղթում և վստահեցնում ենք, որ պատրաստ ենք աջակցել ընտրվող ուժին հնարավոր ամեն ինչով»։
Քաղաքական վերջին զարգացումները տարբեր ուժերի՝ իրար վրա «ցեխ շպրտելու» պրոցեսը «Ռեֆորմիստներ» կուսակցության նախագահը, որն այդ ողջ պրոցեսի ընթացքում լուռ էր, չցանկացավ մեկնաբանել, քանի որ դա «բացառապես այդ ուժերի գործն է»։ Իսկ վարչապետ Փաշինյանի այն հայտարարությունը, թե «Իմ քայլը» դաշինքին ձայն տալով՝ քաղաքացին քվեարկում է ԱԺ-ի լուծարման օգտին, Վահան Բաբայանը կարծիք հայտնեց, որ Փաշինյանը պատասխանատու է իր արած հայտարարությունների համար, և որ գնահատականներ տվողներ անպայման կլինեն։ Բայց միևնույն ժամանակ հավելեց, որ այդ ամենը տեսանելի կլինեն արդեն այս ընտրություններում։