Չի կարելի ասել, որ բոլորին դեմ եմ քվեարկել. Արա Բաբլոյան
Քաղաքական«Այս և նախորդ ընտրությունների միջև` չէի ասի, թե մեծ տարբերություն կա»:
Այս մասին այսօր լրագրողների հետ զրույցում ընտրատեղամասում ասաց Ազգային ժողովի նախագահ Արա Բաբլոյանը: «Ճիշտ է` եղան մեկը մյուսին վիրավորելու դեպքեր, բայց հուսով եմ` առաջ կգնանք և ժողովրդավարությունն էլ ավելի կամրապնդվի»,-ասաց Բաբլոյանը: Արձագանքելով վարչապետի այն հայտարարությանը, թե այս ընտրություններին քվեարկելով՝ քվերակում են արտահերթ խորհրդարանական ընտրությունների օգտին` Բաբլոյանը նկատեց, որ մեկը մյուսի հետ կապ չունի:
Թեև Բաբլոյանը չնշեց, թե ում օգտին է քվեարկել՝ հարցը համարելով ոչ կոռեկտ, այնուամենայնիվ, նշեց, որ քվեարկել է. «Չի կարելի ասել, որ բոլորին դեմ եմ քվեարկել»,-ասաց Բաբլոյանը:
Հարցին` Հանրապետականները ուղղորդե՞լ են՝ ում ընտրել, ԱԺ նախագահը բացասական պատասխան տվեց:
Նրա խոսքով` ընտրություններն ամփոփելուց հետո նոր կարող են գնահատական տալ, թե ինչպիսին էին այս ընտրությունները: Սակայն արձանագրեց` ընտրությունները տարեցտարի ավելի լավ են կազմակերպվում:
Անդրադառնալով առաջիկայում տեղի ունենալիք արտահերթ խորհրդարանական ընտրություններին՝ Բաբլոյանը նշեց.
«Այդ գործընթացը կապված է նրա հետ, որ քաղաքական ուժերը պետք է աշխատեն: Արդեն ստեղծված են աշխատանքային խմբեր, որոնք պետք է աշխատեն օրենսդրական փոփոխությունների վրա. «Ամեն դեպքում դրա մասին խոսելը դեռ վաղ է»,-ասաց ԱԺ նախագահը: