«Մանդատագողերը»
Քաղաքական«Ես ոչ մի տրամաբանության մեջ այլևս չեմ տեսնում նրանց հայտարարությունները, հետևաբար, մեկնաբանելու բան էլ չեմ տեսնում: Այդ մարդիկ 2 տարի բոյկոտով և բողոքով են հանդես գալիս, բայց դեռ որևէ նիստի ժամանակ մենք որևէ թեմա չենք քննարկել իմ պաշտոնավարման հետ կապված»,- Այս մասին ԼՈՒՐԵՐ.com-ի հետ զրույցում ասաց Վանաձորի համայնքապետ Մամիկոն Ասլանյանը՝ անդրադառնալով «Լուսավոր Հայաստան» կուսակցության այն հայտարարությանը, թե Վանաձորի ավագանու անդամները պետք է անվստահություն հայտնեն համայնքապետի հանդեպ, քանի որ 2016 թվականի ՏԻՄ ընտրությունները եղել են «մանդատագողության խայտառակ դրսևորում»:
Ըստ Ասլանյանի, կուսակցության նախագահ Էդմոն Մարուքյանի հետ երբևէ կառուցողական որևէ զրույց չեն ունեցել թեմայի վերաբերյալ. «Իրենք իրենց համար դաշտ են ստեղծել և իրենք ասում են, իրենք էլ լսում են: Մենք մեր բնականոն աշխատանքն ենք շարունակում, ինչպես նաև պատրաստվում ենք մեր քաղաքի՝ այս ամսվա 6-ին կայանալիք տոնին»:
«Լուսավոր Հայաստան»-ի տարածած հայտարարությունը ներկայացնում ենք ստորև.
«Այսօր լրանում է Վանաձորի ՏԻՄ ընտրությունների 2-ամյակը, որը, ինչպես բոլորս ենք հիշում, մնաց պատմության մեջ որպես մանդատագողության խայտառակ դրսևորում:
«Լուսավոր Հայաստան» կուսակցությունը չհանդուրժեց ստեղծված իրավիճակը և հետևողական քայլերի միջոցով հասավ ընդհուպ մինչև ՍԴ՝ հակասահմանադրական ճանաչելով Վանաձորում մոտ մեկ տարի իրականացվող ոչ իրավազոր ավագանու նիստերն ու դրանց ընթացքում ընդունված իրավական ակտերն ու որոշումները: Այս ամենը որևէ կերպ չստիպեց Վանաձորի կառավարումը ստանձնած մեծամասնությանը, մասնավորապես, ՀՀԿ-ին, ՀՎԿ-ին և ՀՅԴ-ին՝ վերանայել իրենց դիրքորոշումներն ու պահվածքը:
Ավելին՝ հեղափոխության օրերին ՀՎԿ և ՀՅԴ կուսակցությունների ղեկավար մարմինների կողմից արված հայտարարությունները նույնպես չկարողացան խարխլել Վանաձորի մակարդակում վերջիններիս տարածքային գրասենյակների անմնացորդ նվիրումը ՀՀԿ-ին: Հաշվի առնելով վերը թվարկված հանգամանքները, ինչպես նաև Վանաձորում շարունակվող Հանրապետականի անարդյունավետ կառավարումը՝ «Լուսավոր Հայաստան» խմբակցությունը սույնով կոչ է անում Վանաձորի ավագանու բոլոր անդամներին միանալ Մամիկոն Ասլանյանին անվստահություն հայտնելու մեր նախաձեռնությանը:
Նախաձեռնությանը կարող են միանալ ինչպես խմբակցությունները, այնպես էլ անհատ ավագանու անդամներ: Եռօրյա ժամկետում ակնկալում ենք հստակ դիրքորոշումների արտահայտում մեր բոլոր գործընկերներից, որից հետո կքննարկվեն հետագա քայլերը: Նախաձեռնությանն ընթացք տալու համար անհրաժեշտ է ավագանու օրենքով սահմանված անդամների թվի 1/3-ը, սակայն մենք առաջ կշարժվենք միայն բավարար քանակի ստորագրություն ունենալու պարագայում»։
Արմինե Միքայելյան