Միջնորդել են Քոչարյանին տուժողի կարգավիճակ տալ
ԻրավունքԵրկրորդ նախագահ Ռոբերտ Քոչարյանի պաշտպանը դիմել է Քննչական կոմիտե, որպեսզի ՀՔԾ և ԱԱԾ պետերի գաղտնալսման գործով իր պաշտպանյալին տուժողի կարգավիճակ տրվի: Այս մասին ԼՈւՐԵՐ.com-ի թղթակցի հետ զրույցում ասաց Քոչարյանի փաստաբան Հովհաննես Խուդոյանը:
Նրա խոսքով՝ գաղտնալսումն անմիջականորեն վերաբերում է Քոչարյանին և հրապարակված ձայնագրության բովանդակությունից կարելի է ենթադրել, որ վերջինիս ազատությունը սահմանափակելուն ուղղված գործողություններ են իրականացվել. «Հստակ լսվում է, որ դատավորին կոնկրետ դատական ակտ կայացնելու մասին ցուցում կամ հանձնարարություն է տրվում, եթե այդ փաստը պարզվի որպես իրականություն, ապա կստացվի, որ ուղղված է եղել Քոչարյանի դեմ՝ վերջինիս ազատությունը սահմանափակելու համար: Այդ հանգամանքը պետք է քննության առարկա լինի, ուստի գործին մասնակից լինելու համար միջնորդել ենք Քոչարյանին տալ տուժողի կարգավիճակ»,- մեզ հետ զրույցում ասաց պաշտպանը:
Խուդոյանը նշեց՝ խոսքը ոչ թե գաղտնալսման գործին է վերաբերում, որը հարուցվել է 146-րդ հոդվածով, այլ ավելի ուշ հարուցված 309 հոդվածի հատկանիշներով՝ պաշտոնեական լիազորություններն անցնելը. «Նույն դեպքի կապակցությամբ երեք գործ կա հարուցված, երկուսը վերաբերում է գաղտնալսման որպես ապօրինի գործողության փաստին, մյուսը՝ դրա բովանդակությանը, որի վերաբերյալ դիմել ենք տուժող ճանաչել»,- նշեց նա:
Հիշեցնենք, որ սեպտեմբերի 11-ին, համացանցում հայտնվեց Ազգային անվտանգության ծառայության տնօրեն Արթուր Վանեցյանի և Հատուկ քննչական ծառայության պետ Սասուն Խաչատրյանի հեռախոսազանգի գաղտնալսման ձայնագրությունը, որտեղ պաշտոնյաները խոսում էին Երկրորդ նախագահ Ռոբերտ Քոչարյանի կալանավորման մասին:
Սոնա Հարությունյան