Գործարարից սկսած՝ մինչև գեներալ-մայորի որդի. ովքեր են Երևանի նոր թաղապետերը
ՎերլուծականԵրևանի քաղաքապետ Հայկ Մարությանի որոշմամբ, այսօր մայրաքաղաքի մի շարք վարչական շրջաններում նոր ղեկավարներ են նշանակվել: Մասնավորապես՝ Կենտրոն վարչական շրջանի ղեկավար է նշանակվել Վիկտոր Մնացականյանը, Նուբարաշեն վարչական շրջանի՝ Թելման Թադևոսյանը Էրեբունի վարչական շրջանի ղեկավար էլ՝ Արման Աբրահամյանը: Նշանակումներից յուրաքանչյուրը ուշագրավ է յուրովի:
Նշանակումներից ամենառեզոնանսայինն այս պահին, իհարկե, Սերժ Սարգսյանի փեսայի՝ Միքայել Մինասյանի սանիկի ՝ Վիկտոր Մնացականյանի նշանակումն է: Մի կողմից այդ նշանակումը կարելի է հասկանալ հենց Փաշինյանի կողմից բազմիցս հնչեցրած՝ «բարիկադների» ապամոնտաժման տրամաբանության մեջ: Երեկ էլ Փաշինյանը հայտարարել էր, որ Սերժ Սարգսյանն այդքան երկար պահել է իշխանությունը, որովհետև հիմնվել է պրոֆեսիոնալների վրա: Միայն թե պաշտոններ շնորհելով նախկին համակարգի մաս կազմող պրոֆեսիոնալ կադրերին, Փաշինյանն ակամայից ընդունում է իր քաղաքական թիմում նմանատիպ կադրերի սնանկությունը:
Ինչ վերաբերվում է Էրեբունու նոր թաղապետին, ապա այստեղ իրավիճակը էլ ավելի հետաքրքիր է: Արման Աբրահամյանը Հանրապետություն կուսակցության կարկառուն անդամ, գեներալ-մայոր Սուրեն Աբրահամյանի որդին է: Հանրապետություն կուսակցությունն էլ իր հերթին ԵԼՔ դաշինքի մաս է կազմում: Ի դեպ, Արման Աբրահամյանին վերջերս էին վերականգնել աշխատանքի ԱԱԾ-ում: Աբրահամյանի որդուն համակարգից ազատել էին դեռեւս 2008 թվականի մարտյան դեպքերից հետո: Նոր իշխանությունը փաստորեն վերականգնեց նրան իր աշխատանքում, իսկ այնուհետև ավելի հարմար գործ գտավ վերջինիս համար: Ստացվում է, որ մի կողմից Նիկոլ Փաշինյանը հայտարարում է, թե իրենք դեմ են քաղաքական գործընթացներում ընտանեկան ավանդույթներին, մյուս կողմից՝ իր քաղաքական դաշնակից հանդիսացող ուժի ղեկավարներից մեկի որդին այսօր բավական յուղալի պաշտոն է ստանում: Այդ դեպքում՝ ստացվում է, որ նոր իշխանությունները դեմ են այդ ավանդույթներին, սակայն՝ ընտրողաբար:
Նուբարաշենի նորանշանակ թաղապետը հանդիսանում է «Գրին Վեյ թրեվլ» տուրիստական ընկերության տնօրենը: Թե ինչպես է գործարարը նշանակվում թաղապետ՝ գիտի միայն Հայկ Մարությանը, սակայն, եթե նշանակում է՝ ուրեմն մի բան գիտի: Գուցե իր տուրիստական բիզնեսի զարգացման նպատակով նորանշանակ թաղապետը ի վերջո լուծի՞ Նուբարաշենի աղբանոցի հարցը, ինչպես ասում են՝ համ գայլերը կուշտ կմնան, համ գառները՝ ողջ:
Ս.Խաչատրյան