Ես նեղացած չեմ դուրս եկել աշխատանքից. Անդրանիկ Մանուկյան
ՔաղաքականՄամուլում տարածված լուրերի համաձայն՝ Ուկրաինայում ՀՀ նախկին դեսպան Անդրանիկ Մանուկյանը չի բացառվում, որ կմնա Ուկրաինայում, քանի որ խոսակցություններ կան, թե աշխատանքի առաջարկ է ստացել Ուկրաինայի նախագահ Պյոտր Պորոշենկոյից: Թեև տեղեկությունները ԼՈւՐԵՐ․com-ի թղթակցի հետ զրույցում նախկին դեսպան Անդրանիկ Մանուկյանը չցանկացավ մեկնաբանել, սակայն նշեց՝ աշխատանքի անցնելու դեպքում այդ մասին կտեղեկանանք։
Նա ցանկություն հայտնեց վերադառնալ Հայաստան և այստեղ որևէ աշխատանքի անցնել․ «Մեր կյանքում ամեն ինչ հնարավոր է, ոչինչ բացառված չէ։ Աշխատանքի տարբեր առաջարկներ եմ ստացել, այդ թվում՝ միջազգային հեղինակավոր կազմակերպություններից, սակայն Հայաստան վերադառնալու ցանկություն ունեմ։ Բայց ես դեռևս հրաժեշտի հանդիպումներ եմ ունենում իմ նախկին գործընկերների, նախարարների, միջազգային կառույցների ներկայացուցիչների հետ, որոնց հետ տարիներ շարունակ սերտ համագործակցության մեջ եմ եղել։ Չնայած երկրների միջև եղած քաղաքական պասիվ հարաբերություններին՝ ես կարողացել եմ միշտ կայուն պահել դրանք, որպեսզի հակահայկական քայլ չկատարվի իմ հայրենակիցների նկատմամբ: Պետք է նշեմ, որ նման մտադրություն ժողովրդի կողմից չի էլ եղել, իսկ իշխանությունների կողմից` թույլ չեն տվել, իրենք մշտապես ձեռնամուխ են եղել, որ հայ համայնքն իրեն ապահով զգա»,- նշեց Մանուկյանը` ընդգծելով, որ Ուկրաինայի հայ համայնքն այնտեղ որևէ խնդիր չի ունեցել։
Նախկին դեսպանն, անդրադառնալով մամուլում իր անձի վերաբերյալ որակումներին ու ձևակերպումներին՝ նշեց․ «Ես «նախկին իշխանությունների ներկայացուցիչը» չեմ եղել, ես ՀՀ արտակարգ և լիազոր դեսպանն եմ եղել Ուկրաինայում և 8․5 տարի պատվով կատարել եմ դեսպանի դերը Ուկրաինայում։ Հնարավորինս արել եմ ամեն ինչ, որպեսզի և՛ մեր երկրի, և՛ հայ համայնքի պատիվը բարձր պահեմ։ Ես հայ եմ, սիրում եմ իմ հայրենիքը և որտեղ էլ լինեմ՝ շարունակելու եմ բարձր պահել հայի և մեր երկրի անունը»,- ասաց նախկին դեսպանը։
Խոսելով հայաստանյան ներկա իշխանությունների և հետագայում նրանց հետ հնարավոր համագործակցության մասին, Մանուկյանը նախևառաջ հաջողություն մաղթեց վերջիններիս, որպեսզի կարողանան երկիրը դարձնել զարգացած և հզոր։ «Ես նեղացած չեմ դուրս եկել աշխատանքից, քանի որ իմ դիմումի համաձայն եմ հեռացել պաշտոնից։ Ես որևէ մեկից որևէ պահանջ չունեմ, միայն ցանկություն ունեմ, որ մեր երկրում ամեն բան լավ լինի։ Ինձ համար կարևոր է հայ ժողովրդի ու Հայաստանի շահը»,- եզրափակեց Մանուկյանը։
Հիշեցնենք, որ Ուկրաինայում ՀՀ նախկին դեսպան Անդրանիկ Մանուկյանն այս տարվա օգոստոսի 22-ին հայտարարեց իր դիվանագիտական աշխատանքը դադարեցնելու որոշման մասին։ Ի դեպ, նրան այդ պաշտոնում կփոխարինի Չեխիայում ՀՀ դեսպան Տիգրան Սեյրանյանը: Նշվում է, որ Սեյրանյանի ագրեմանը դեռ չկա, բայց լավատեղյակները պնդում են` այն դեռ կձգձգվի:Սոնա Հարությունյան