Ինչու է ԼԳԲՏ անդամը հանդիպել Արայիկ Հարությունյանի հետ

Համացանցում վաղ առավոտից ակտիվ քննարկվում են ԼԳԲՏ համայնքի ակտիվիստի և Կրթության ու գիտության նախարար Արայիկ Հարությունյանի հանդիպման կադրերն ու զրույցի առեղծվածային թեման: 

Կադրերը հրապարակել է ֆեյսբուքյան օգտատեր Սամվել Մելիքյանը, այն մեկնաբանելով հետևյալ կերպ. «ԼԳՊՏ համայնքի ակտիվիստ, կարկառուն ներկայացուցչի հանդիպումը` կրթության նախարարի հետ: Հետաքրքիր կլինի իմանալ հանդիպման շարժառիթները և քննարկման թեման»:

ԿԳՆ մամուլի խոսնակ Լուսինե Մարգարյանը ԼՈՒՐԵՐ.com-ի հետ զրույցում նշեց, որ նախարարն ամեն ամիս մի շարք քաղաքացիների է ընդունում, իսկ այդ ընդունելությանը կարող է մասնակցել յուրաքանչյուր ոք: 

Մեր այն ճշտող հարցին, թե նախարարը ԼԳԲՏ համայնքի ներկայացուցիչների հաճա՞խ է ընդունում իր մոտ, Մարգարյանը պատասխանեց. «Գիտեք, այդ հանդիպումները լինում են ամիսը մեկ, և յուրաքանչյուրն էլ գալիս է: Թե ինչ դավանանքի կամ ինչ կողմնորոշման են նրանք՝ մեր գործը չէ: Նրանք ԿԳ նախարարի մոտ գալիս են այն խնդիրներով, որոնք առչվում են անձամբ իրենց և կրթության ոլորտին»: 

Այն դիտարկմանը, թե կրթության ոլորտին վերաբերող ինչ խնդիրներ են քննարկել Արայիկ Հարությունյանն ու ԼԳԲՏ ներկայացուցիչը, խոսնակը հրաժարվեց պատասխանել, պատճառաբանելով, թե դա անձնական է և հրապարակման ենթակա չէ: 

ԼԳԲՏ համայնքին սատարող «Նոր սերունք» մարդասիրական ՀԿ-ի լրատվության բաժնից մեզ փոխանցեցին, որ իրենց անդամներից ոչ ոք հանդիպում չի ունեցել ԿԳ նախարարի հետ. «Ըստ երևույթին՝ այդ անձը մեր ՀԿ-ի անդամ չէ»: 

Ստացվում է նաև այնպես, որ ԼԳԲՏ համայնքի ներկայացուցիչները, հանդիպելով ԿԳ նախարարի հետ և իրենց համայնքին հուզուղ խնդիրները բարձրաձայնելով, այնուամենայնիվ, կկարողանան լուծման ճանապարհներ գտնել:

Արմինե Միքայելյան