Փաշինյանին ճնշում են
ՔաղաքականՎարչապետ Նիկոլ Փաշինյանի և Ադրբեջանի նախագահ Իլհամ Ալիևի ոչ պաշտոնական հանդիպումից հետո ռուս քաղաքագետ Ստանիսլավ Տարասովը 168.am-ի հետ հարցազրույցում ուշագրավ հայտարություններ է արել, մասնավորապես, ասել է թե՝ «Փաշինյանն ու Ալիևը հունիսին ստորագրելու են Արցախի խնդրի վերաբերյալ համաձայնագիր, որտեղ հայկական կողմն անուղղակի փոխզիջումների ներքո ստիպված է լինելու զիջել մի քանի շրջաններ»: Նրա այս հայտարարությունը թեև ուշագրավ է, սակայն իրականության հետ աղերսները հարցականի տակ է դնում: Այս հայտարարության կողքով անտարբեր չեն անցել նաև համացանցային տիրույթի հայ օգտատերերը, որոնց մի մասը պնդում է, թե սա էժանագին քայլ է, իբրև Ռուսաստանը ցանկանում է սադրել՝ այդպիսի տեղեկատվությունը դաշտ նետելով, մի որոշ մասն էլ պնդում է, թե սա հանդիպումից հետո հայկական կողմի դիրքերի թուլացման նշան է:
Քաղաքագետ Լևոն Շիրինյանի կարծիքով, Տարասովը փորձում է ռուսական կողմից հայ-ադրբեջանական հակամարտությունում ուղղորդում մտցնել:
«Տարասովը բավականին խելացի վերլուծաբան է, որը Հայաստանի և Ադրբեջանի պատմությունը շատ լավ գիտի, որը խոսում է գրեթե ճշմարիտ, դատողությունները ճշմարտանման են: Սակայն սա այդ դեպքը չէ: Նա բոլոր խեղաթյուրումներն անգիր գիտի և վարպետորեն խեղաթյուրում է»,- ԼՈՒՐԵՐ.com-ի հետ զրույցում ասաց Շիրինյանը:
Քաղաքագետի կարծիքով, սա անհիմն հայտարարություն է Տարասովի կողմից. «Ես էլ պնդում եմ, որ հուլիսին ԱՄՆ-ի կողմից ճնշումներ են լինելու Ռուսաստանի նկատմամբ: Ռուսաստանը «ճկռելու» է ԱՄՆ-ի ճնշումների ներքո: Իմ ասածը ճմարիտ է այնքան, որքան Տարասովի հայտարարությունը: Նա ի՞նչ է սկսել է Վանգայի նման գուշակություններով զբաղվել»:
Նման հայտարարությունները Շիրինյանին թույլ են տալիս կարծել, թե ռուսական կողմից վարչապետի նկատմամբ կա ահռելի ճնշում:
Ալիևի հետ հանդիպումից ժամեր անց վարչապետ Փաշինյանն իր ֆեյսբուքյան էջում հայտնել է, որ հեռախոսազրույց է ունեցել ԱՄՆ նախագահի ազգային անվտանգության հարցերով խորհրդական Ջոն Բոլթոնի հետ: Այստեղ հատկանշականն այն է, որ վարչապետը հետգրության մեջ նշել է, թե Արցախյան հարցին անդրադարձ չի եղել:
Շիրինյանը կարծում է, որ դա այդպես չէ, և, այնուամենայնիվ, Բոլթոնի հետ Արցախյան հակամարտության վերաբերյալ քննարկում եղել է. «Եթե ասում է չեն խոսել, դա դեռ չի նշանակում, թե այդ թեմայով չեն խոսել: Նա պարտավոր չէ ամեն ինչ ասել»:
Արմինե ԱՐՄԵՆԱԿՅԱՆ