Գորիսի մայթերը` ավտոկայանատեղի
ՀասարակությունԳորիսեցիների ամենահայտնի սովորույթներից մեկը փողոցի կենտրոնով քայլելն է: Երևի այդ է պատճառը, որ քաղաքում քիչ են բարեկարգ մայթերը: Արի ու տես` վարորդները, չկարողանալով լեզու գտնել հետիոտների հետ, զբաղեցրել են նրանց հատկացված տարածքները: Իսկ ավելի լուրջ` խնդիրն, իրոք, առաջնային է:
Երևան-Իրան մայրուղին, որն անցնում է Գորիսի կենտրոնով, ավտոմեքենաների կայանման պատճառով շատ ծանրաբեռնված է, որն էլ խնդիրներ է առաջացնում թե՛ այլ մեքենաների և թե՛ հետիոտների համար: Ավելին` վարորդների ապահով տեղի փնտրտունքը հաճախ նրանց տանում է մայթեր: Մատների վրա հաշված մայթերին ամենուր մեքենաներ են կանգնած. շատ հաճախ` նրանք կանգնում են ոչ թե մի քանի ժամով, այլ` օրերով, ու անգամ` ամիսներով: Օրինակ` Սալ-քար թաղամասից հարյուրավոր երեխաներ ամեն առավոտ դպրոց գնալիս ստիպված պիտի կրթօջախ հասնեն` քայլելով միջպետական մայրուղու ուղիղ կենտրոնով (այն էլ հիմա՝ ձմռանը): Եվ սա` միակ դեպքը չէ. սեփական տնատիրությունների ավտոատեր բնակիչները սեփականաշնորհել են իրենց տան դիմացի մայթերը ու մեքենաների համար մշտական կայանատեղի դարձրել:
6-րդ սպայական վաշտի հրամանատար Գեղամ Մարգարյանը, հեռախոսազրույցի ընթացքում կարևորելով բարձրացված հարցը, նշեց, որ անվտանգ երթևեկ ապահովելու համար ամենօրյա աշխատանքներ տարվում են և խոստացավ վաղվանից ավելի ուժեղացնել վերահսկողությունը, հանել մայթերից մեքենաները:
«Խնդրին հիմնային լուծում տալու համար պետք է համագործակցեն և´ ոստիկանությունը, և´ ՃՈ-ն, և´ համայնքային իշխանությունը: Նման խնդիրներին նպաստում է նաև նոր մեքենաների հոսքը Հայաստան: Միայն այս տարի մինչև հունվարի 16-ը մեր հանրապետություն ներկրվել է 12 հազար ավտոմեքենա, որոնց համար, բնականաբար, կայանելու տեղ է անհրաժեշտ: Մեր փողոցի լայնությունը 7,2 մ է և պատկերացրեք` յուրաքանչյուր կողմին բաժին է ընկնում 3,5 մետրից մի քիչ ավել տարածք: Մեկ մեքենայի անցնելու համար անհրաժեշտ է 2,2 մ, ու եթե մեկ կողմում կայանում է ևս մեկ մեքենա` խաթարվում է նորմալ երթևեկությունը: Հարցի լուծման համար պետք է որոշ հատվածներում կանգառն արգելող նշաններ դնել՝ իհարկե Կապի և տրանսպորտի նախարարության թույլտվությամբ: Օրինակ` Գորիս համայնքի ղեկավար Ա.Առուշանյանի կողմից տաքսիների համար տարածք է հատկացվել: Սակայն, վարորդները կայանում են իրենց նախընտրած տարածքում: Մեր աշխատակիցները, երբ մոտենում են արձանագրություն կազմելու, նրանք պնդում են, թե ուղևոր են բերել: Եթե կայանելն արգելող նշան չկա` շատ դժվար է համակարգելը: Ինչ վերաբերում է մայթերին մեքենաների կայանելուն` դա օրենքով կարգավորված է արդեն, վաղվանից կուժեղացնենք ծառայությունը և մայթերից հնարավորինս կհանենք մեքենաները»:
Հաջորդ տարբերակը, ըստ վաշտի հրամանատարի, միջպետական ճանապարհի` գորիսյան հատվածի շրջանցումն է:
Գորիս համայնքի ղեկավար Առուշ Առուշանյանը պատրաստ է համագործակցության:
«Մենք ծրագրով նախատեսում ենք ավտոկայանատեղի կառուցել, որի շնորհիվ մայթերն ու բակերը կբեռնաթափվեն` հատկապես մեծ և փոքր չշահագործվող մեքենաներից: Հնարավորություն կստեղծենք շահագործվող մեքենաների համար ևս: Ինչ վերաբերում է պարոն Մարգարյանի` միասնական ուժերով աշխատանքին` ես, իհարկե, պատրաստ եմ»:
Մնում է` վարորդներն էլ կարգապահություն դրսևորեն և հարցը իր լուծումը կստանա:
Արևիկ Աբելյան