Մարությանը պարզե՞ց՝ ուր են գնում համատիրությունների փողերը
ՎերլուծականԵրևանի ավագանու վերջին ընտրությունների ժամանակ «Իմ քայլի» քաղաքապետի թեկնածու Հայկ Մարությանը հատուկ անդրադարձ էր կատարել Երևանում առկա համատիրություններին, հայտարարելով, որ ոչ ոք չգիտի համատիրության հավաքած փողերն ինչ են լինում, համատիրությունները ոնց են ստեղծվել. «Մենք պետք է զրոյից սկսենք համատիրությունների ձեւավորումը: Բոլոր շենքերի բնակիչներն իրենք պետք է ժողով հավաքեն ու ընտրեն համատիրության նախագահ, հետո պահանջեն, որ ինքը իրականացնի այն գործառույթները, որը պարտավոր է: Գումարների հավաքման, ծախսման պրոցեսը պետք է լինի թափանցիկ: Համատիրությունների մեծ անձնակազմը ոչ մեկի պետք չի, դրանք փոխարինվում են մեկ-երկու մարդով, որոնք համագործակցում են մասնագիտացված ընկերությունների հետ, որոնք վերանորոգում են ձեր վերելակը, բակը: Դա ավելի էժան կնստի ձեր վրա»:
Եթե կարճ, ապա հենց այսպիսի կայսերական ծրագրեր ուներ ապագա քաղաքապետը կապված՝ երևանցիների համար մեծագույն գլխացավանքի վերածված համատիրությունների մասով: Գլխացավանք այն պարզ պատճառով, որ համատիրությունները նախորդ իշխանությունների կողմից ստեղծվեցին իբրև քաղաքացիներից փող «պոկելու» հավելյալ մեխանիզմներ, ինստիտուտներ: Այս մեխանիզմը իր մեջ նաև կոռուպցիոն տարրեր է պարունակում, քանի որ քաղաքացիները պարզապես չեն էլ հասկանում, թե այդ որ ծառայությունների դիմաց են վճարում և ուր է այնուհետև ուղղվում այդ գումարը: Սակայն ինչպես և Մարությանի մյուս խոստումները, այս մեկը ևս գրվեց քարին: Բանն այն է, որ որոշ համատիրություններ առանց որևէ հիմնավորման բարձրացրել են քաղաքացիներից գանձվող սպասարկման վարձը, որոշ դեպքերում անգամ կրկնակի: Արդյո՞ք քաղաքապետը գոհ է ինքն իրենից, արդյո՞ք նա հենց այսպես էր տեսնում երևանցիների սոցիալական բեռի թեթևացումը…