«Զորաշեն» ՍՊԸ-ն չի հերքում ԱԱԾ-ի կողմից տնօրենի ձերբակալման մասին լուրը
ՔաղաքականՔիչ առաջ տեղեկություն տարածվեց, որ ՀՀ Պետական վերահսկողական ծառայության երկու աշխատակիցներ Սամվել Ադյանը և Գևորգ Խաչատրյանն են ԱԱԾ-ի կողմից երեկ գիշերը բերման ենթարկված անձինք: Ինչպես նաև նշվում է, որ ձերբակալվածների մեջ է «Զորաշեն» ՍՊԸ-ի տնօրեն Տարոն Ավետիսյանը:
ՍՊԸ-ի աշխատակից Արթուր Կարապետյանը ԼՈՒՐԵՐ.com-ի հետ զրույցում չհերքեց Տարոն Ավետիսյանի՝ բերման ենթարկման մասին լուրերը:
«Պարոն Ավետիսյանն այս պահին այնպիսի տեղում է, որ չի կարողանալու ձեր հեռախոսազանգերին պատասխանել, այ որ մի քանի օրից զանգահարեք, կկարողանաք խոսել իր հետ»,- այսպես պատասխանեց ՍՊԸ-ի աշխատակիցը մեր այն հարցին, թե ինչու չենք կարող խոսել տնօրեն Տարոն Ավետիսյանի հետ և մի՞թե ճիշտ է բերման ենթարկելու մասին լուրը:
Մեր այն դիտարկմանը, թե փաստորեն, գիտի՞ Ավետիսյանի գտնվելու վայրը, և ի վերջո՝ որտեղ է նա հիմա, ՍՊԸ-ի աշխատակիցը կրկնեց, որ մի քանի օրից զանգահարելու դեպքում միանշանակ կկարողանա պատասխանել մեր հարցերին:
Հիշեցնենք, որ 2019 թ.-ի հունվարին Վանաձորի ԲԿ-ն հայտարարել է հեմոդիալիզի պարագաների մրցույթ, որին մասնակցել և հաղթող է ճանաչվել «Զորաշեն» ՍՊԸ, սակայն Hetq.am-ի հայտնի հոդվածում նշվում է, որ տվյալ ՍՊԸ-ն մրցույթում հաղթել է ոչ օրինական ճանապարհով:
Հիշեցնենք, որ ՀՀ ԱԱԾ մամուլի պատասխանատու Սամսոն Գալստյանը ևս այսօր մեզ հետ զրույցում չէր հերքել ՊՎԾ աշխատակիցներին բերման երնթարկելու մասին լուրերը, իսկ ՊՎԾ մամուլի խոսնակ Զարուհի Մեջլումյանն էլ նշել էր, որ իրենք տեղյակ չեն ՊՎԾ-ից բերման ենթարկված աշխատակիցներից:
Արմինե ՄԻՔԱՅԵԼՅԱՆ