Թմրամիջոցների «սողացող» օրինականացման սկիզբը տրվեց
ՎերլուծականՀայաստանի Հանրապետության Արդարադատության նախարարության Իրավական ակտերի նախագծերի հրապարակման միասնական հարթակում՝ e-draft.am կայքում քննարկման է դրվել «Թմրամիջոցների և հոգեմետ (հոգեներգործուն) նյութերի մասին» ՀՀ օրենքում փոփոխություններ կատարելու մասին նախագիծ, որով առաջարկվում է օրինականացնել թմրամիջոցների և արգելված նյութերի օգտագործման օրինականացում գիտական, ուսումնական և փորձագիտական նպատակներով։ ՀՀ առողջապահության նախարար Արսեն Թորոսյանը հերքել էր լուրերը, թե կառավարությունը պատրաստվում է օրինականացնել թմրանյութերի ազատ վաճառքը, շրջանառությունն ու օգտագործումը:
Գաղտնիք չէ, սակայն, որ այն բոլոր երկրներում, որտեղ ամբողջությամբ օրինականացվել է թմրադեղերի օգտագործումը, առաջին փուլը հենց փորձագիտական նպատակներով դրանց կիրառմանը «դաբրո» տալն էր: Հեղափոխական թիմին հաճախ էին մեղադրում սորոսական բարքերը Հայաստան բերելու ցանկության մեջ: Դրան հակառակ մենք լսել ենք միայն Փաշինյանի հայտարարությունը, որ պատրաստվում է կոտրել նարկոտրաֆիկի ողնաշարը, ինչպես նաև սույն նախագծի հեղինակ Արսեն Թորոսյանի հավաստիացումները, որ ինքը թմրանյութերի ազատ վաճառքի թիվ մեկ թշնամին է: Չենք ցանկանում կասկածի տակ դնել այդ փաստը, սակայն մտահոգիչ է, որ այսքան հավաստիացումներից հետո կառավարությունը, այնուամենայնիվ, գնում է նման կործանարար քայլի:
Արդյո՞ք հաշվարկվել են ռիսկերը: Արդյո՞ք կառավարությունը գիտակցում է, որ Հայաստան տոննաներով կարող է ներկրվել թմրամիջոց և ներկայացվել իբրև օրինական ճանապարհով ներկրված, փորձագիտական, ուսումնական նպատակներով: Հետագայում թմրամիջոցի այդ շարժը վերահսկվելո՞ւ է, և ընդհանրապես, ի՞նչ ասել է գիտական, ուսումնական և փորձագիտական նպատակ. լղոզված սահմանում է, չէ՞…