Ինչու է ԴԱՀԿ-ն վաճառքի հանել «Ֆրանկ Մյուլլեր»-ի գույքը. պարզաբանում
ՀասարակությունՕրեր առաջ տեղեկություն տարածվեց, որ Արդարադատության նախարարության դատական ակտերի հարկադիր կատարման ծառայությունը վաճառքի է հանել շվեյցարական ժամացույցների «Ֆրանկ Մյուլլեր» ընկերության ցուցափեղկերով սեղանները: Տեղեկացնենք, որ ընկերության սեփականատերը շվեյցարահայ գործարար, Մարսելում ՀՀ գլխավոր հյուպատոս Վարդան Սիրմաքեշն է:
Թե ինչպես են շվեյցարական ընկերության սեղանները հայտնվել ԴԱՀԿ պահեստում, փորձեցինք պարզել հենց այնտեղից: ԼՈւՐԵՐ․com-ի հարցմանն ի պատասխան գլխավոր հարկադիր կատարողի օգնական Գոհար Կուրղինյանն ասաց, որ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից տրված կատարողական թերթի հիման վրա Հարկադիր կատարումն ապահովող ծառայության պետական եկամուտների կոմիտեի օգտին, դատախազության հարցերով և քրեական գործերով բռնագանձումների Երևան քաղաքի բաժնում հարուցվել է կատարողական վարույթ:
Ըստ կատարողական թերթի պահանջի՝ մաքսային պահեստում առկա գույքերը ճանաչվել են տիրազուրկ՝ հանձնելով ՀՀ սեփականությանը. «Մատնանշված գույքի՝ ''Frank Muller'' ցուցափեղկով 1 սեղանը փորձագետի եզրակացությամբ գնահատվել է 18 000 ՀՀ դրամ (թվով 8, ընդհանուր՝ 144 000 դրամ): 16.08.2018 թ. որոշում է կայացվել արգելադրված գույքը հարկադիր էլեկտրոնային աճուրդով իրացնելու մասին:
«Հրապարակային սակարկությունների մասին» ՀՀ օրենքով սահմանված կարգով՝ լոտի մեկնարկային գին է սահմանվել 108 000 դրամը և հարկադիր էլեկտրոնային աճուրդի սկիզբ է սահմանվել 27.08.2018 թ.:
Թվով 13 չկայացած աճուրդների արդյունքում հերթական աճուրդով (աճուրդի մեկնարկը՝ 13.03.2019թ.) լոտի մեկնարկային գին է սահմանվել 30 500 դրամը»,- ասաց գլխավոր հարկադիր կատարողի օգնականը:
Սոնա Հարությունյան